District Bawrhsap hovin District Executive Committee on DAY-NULM thutkhawm neih a ni

Serchhip District Executive Committee on DAY-NULM chu niminpiah khan an Chairman, District Bawrhsap, Sangchhin Chinzah hovin a Office Chamber-ah an \hukhawm a, DAY NULM hnuaia Shelter for Urban Homeless a\anga Shelter Home sak mek leh City Livelihood Centre a taka kalpui chhoh dan tur an sawiho.

He \hutkhawm ah hian Bawrhsap chuan khawpuia mirethei zawkte, chenna neilote, hnathawh tur mumal neilote, Insakna neilo te inhmakhawsuih nan sorkar chuan hma nasa takin a la mek tih sawiin, Serchhip District-ah pawh hmalakna tam tak kalpui mek a nih thu a sawi a, chung hmalakna te chu a taka thawktute an ni tih sawiin, “A taka thawktuten hmalakna hmantlak, rahchhuak tlak ngeia hma kan lak a \ul a, chuvang chuan ruahmanna pawh fel tak kan neih a \ul a ni,” a ti bawk.

DAY-NULM hnuaia Shelter for Urban Homeless hnuaiah hian UD&PA Serchhip hian Social Welfare Department te nena thawhhona siamin tunah hian Serchhip P&E Veng-ah Rs. 20,08,000/- sengin Shelter Home sak mek a ni a. He Shelter Home sak hi UD&PA in Shelter for Urban Homeless fund hmanga sain a luah leh enkawl zui hna chu Social Welfare ten an bawhzui thung dawn a ni. He Building sak mek hi tlema tih danglam ngai, Toilet hunna siamrem ngai a awm avangin nimin khan a hmunah enfiah nghal a ni bawk.

Hei bakah hian Serchhip District-a City Livelihood Centre dinna tur pawh cheng nuai 10 hmuh ni tawhin he Centre a taka kalpuina tura proposal buatsaih niin sawiho nghal a ni a. He Centre hi nitin hnathawh tur nei mumallo te hnathawh tur zawn saka, a \ul ang zela \anpui tu tur Office leh Centre a ni a. Chung hna te bakah chuan internet hmanga mipuite mamawh hna chi hrang hrang thawh sak thei tura duan a ni a. He Meeting hian sum awmchhun hmang he City Livelihood Centre (CLC) kum thum chhung amaha kala, a hnu zela amaha a inenkawl zui theih dan tur ruahmanna chipchiar tak (detail propossal) siamin, thuneitu sang zawkte hnena thlen a ni ang a, an ni hian an lo pawm chuan a taka kalpui nghal a ni tawh dawn a ni.

Serchhip khawpui leh Serchhip District chhungah hian Urban Development & Poverty Alleviation Department hian hmalakna an nei tam hle a, heng an hmalakna hrang hrangte hi Department in chak zawka a enkawl theih nan tunah hian District Urban Development Officer's Office hawng turin chak taka hmalak mek a ni a, reiloteah Serchhip hian DUDO Office a nei thuai tawh dawn a ni.