Latest News

Polling Station ven ngun ngai bik 21 awm.

April ni 30,2015 a Mizoram District 6-a Village Council leh Local Council inthlanna lo awm turah Polling Station ven ngun bik ngai 21 a awm a. Zirtawpni thleng khan State Election Commission (SEC) chuan Model Code of Conduct bawhchhiaa puhna, complaint 5 a dawng tawh bawk.
    Tunkar Ningani a Mizoram District 6-a Village Council inthlanna, Village Council 536-a neih tura ruahman ah hian General-ah VC seat 1682 leh Hmeichhe tana seat hauh ah 600, a vaiin seat 2282 a awm a. Amaherawh chu Hel pawl nia hriat mi \henkhatte vauna avangin Aizawl District chhunga khaw 25 leh Kolasib District chhunga khaw 6-ah chuan Nomination File an awmloh avangin inthlanna hi neih a ni dawn lo a, heng khaw 31-ah hian a vaiin VC seat 123 a awm a ni. Inthlanna tur VC 536-ah hian Polling Station 536 awmin Polling Booth 597 a awm dawn a, Polling Station 536 zinga Polling Station 21 te chu venhim ngai bik (Sensitive Polling Station) niin heng zinga 2 hi hlauhawm lehzual (Hyper Sensitive) a ni a. Polling Station venhim ngai bik te hi Kolasib District ah 8, Mamit District ah 6 leh Lunglei District ah 7 te an ni a, Champhai leh Serchhip District ah chuan Polling Station venhim ngai bik hi a awm lo thung a. Polling Station hlauhawm lehzual (hyper sensitive) hi N.Thinglian leh Meidum te niin Sensitive Polling Station te hi Hmar helpawl leh Tuikuk (Bru) helpawl te chetna hmunte an ni.
    Hetihlai hian State Election Commission chuan Zirtawpni  (April 24, 2015) thleng khan Model Code of Conduct (MCC) bawhchhiaa puhna (complaint) 5 a dawng tawh bawk a, heng zingah hian Horticulture-in Meidum-a NLUP an sem chu titawp turin a hriattir a, Department pakhat in Engineer te awmna a siksawi pawh inthlan puan hnua tih a nih vangin sut leh turin a hriattir dawn nia thudawn a ni bawk. Hetihlai vek hian VC inthlanna neih turah hian chuhtu  dang awmloh avangin VC 6-ah chuan inthlanna neih a ni dawnlo bawk a, chuhtu awmlo a VC tlinna te hi Kolasib Electric Veng (MNF 4 & Ind.1), Selam (Congress 5), Hrianghmun (Congress 2 & Ind. 1), Teikhang (Congress 4 & Ind.1), New Hruaikawn (Congress 3), Zawngtetui (Congress 3) te an ni a, Chhanchhuahna Khawpui leh Dilkhan VC-ah te Congress in Reserved seat chuh tura Candidate an siam chu chuhtu awm lova tlingah puan an ni bawk.

Comments

Popular News (Last 30 Days)