Presbyterian Mizoram Synod hmalakna in Serchhip-ah FG&C Centre hawn a ni.

Presbyterian Mizoram Synod chuan nimin Jan. 8, 2014 khan Serchhip-ah Family Guidance & Counselling Centre(FG&CC) hawngin he Centre-a Councillor tur, Rev. C. Lalrintluanga chu dahnghehna neih nghal a ni.

    Mizoram Synod in Serchhip-a Family Guidance & Counselling Centre(FG&CC) an dah tur hawnna inkhawm hi nimin khan Presbyterian Serchhip Kawnpui Kohhran Biak In-ah neih a ni a. He hunah hian Rev. R. Lalhmingthanga Director FG&CC in inlawmna thu sawiin Mizoram Synod Moderator Rev. Lalrinmawia’n Counselling Centre thar hi a hawng a. Synod Moderator chuan “Pathian thiltum hi tihdam a ni,” tiin, khawvel changkang zelah Counselling mamawh kan pun tial tial thu leh Depression neih vanga hrehawm taka nun hmang mek te, nupa karah te, inngaizawng karah te, nu leh pa leh fate inkar leh leiba leh a dangte avanga harsatna tawk te hian Counselling an mamawh em em tih a sawi a. Hei vang hian Synod chuan District Capital tinah Counselling Centre din a tum tih a sawi bawk.
    Kum 1995 a Synod Inkhawmpui khan Family Guidance & Counselling Centre (FG&CC) din hi an rel a, hemi ang hian Synod Executive Committee in hma la zuiin Jan. ni 21, 1997 khan Synod Conference Centre-ah khatih hunlaia Synod Moderator Rev. Vanlalfaka’n FG&CC hi a hawng a. Kum 2009-ah Aizawl Chanmari-ah Counselling Centre hi hawn belh leh a ni a, nikum, 2014 khan Aizawl Vaivakawn leh Champhai-ah te Centre hi hawn leh a niin nimin a Serchhip-a Centre hawn a nih rual hian Kolasib-ah pawh hawn nghal a ni a,heng te nen hian Family Guidance & Counselling Centre (FG&CC) hi Mizoram-ah 6 a awm ta a ni. Tun dinhmunah Family Guidance & Counselling Centre (FG&CC) hnuaiah hian Director hovin thawktu mi 13 an awm mek a, Centre hawn hmasak 4 ah te hian a dintirh a\angin tlawhtu (Client) 11,297 zet an nei tawh a, mi tam takin an hmang \angkai mek zel nia report a ni. Serchhip a FG&CC hawn tak hian AOC a S. Kawnpui Branch K|P te In an luah anga, February 2014 thla chho vel a\angin an function \an theih beisei a ni.