Assam leh Mizoram ramri buai chingfel turin State pahnih aiawhte \umhnih an inbe tawh.

Home Minister Pu R. Lalzirliana chuan Assam leh Mizoram ramri buaina chingfel turin sorkar leh sorkar inbiak a \ul thu sawiin, Assam leh Mizoram sorkar aiawhte inbiakna \um hnih neih a nih tawh thu a sawi.

Mizoram State Legislative Assembly Session neih mekah MNF member, Pu Lal-rinawma zawhna leh zawhbelhna dangte chhangin Home Minister chuan Inner line reserve Forest, Cachar Forest Division enkawlna hnuaia awm mek chu chingfel turin sorkar leh sorkar inbiak a \ul thu sawiin, Assam sorkar aiawhte biak pawh an nih hnuah New Delhi-a inbe turin ruahmanna siam a nih thu a sawi a. Mizoram Sorkar lam aiawhten harsatna an neih tak vangin \hulh a ni tih sawiin, hemi hnu hian Guwahati ah \um hnih inbiakna neih a nih tawh thu leh inbiakna hi neih chhunzawm zel a nih tur thu a sawi a. Mizoram sorkar chuan dawihzep taka tawlh a tum lo tih Home Minister chuan sawiin, Assam leh Mizoram inrina chu km 123 a ni tih a sawi a, Inner line reserve area Sq kilometre 509-a zau enkawl hna chu Cachar Forest Division kuta dah a nih thu leh he reserve \hiat tura hmalakna Home Department in a nei lo tih sawiin, \hiah leh \hiah loh chu Sorkar laipui thuneihna a nih thu a sawi bawk
    Hei bakah hian Home Minister chuan Police Out Post ah te lirthei dah vek Sorkarin duh mahse sum harsatna avangin tih hleihtheih a ni lo tih a sawi a, Motor thar te chu Officer lamin an chang deuh tlangpui tih sawiin, Out post leh Police Station ten motor thar an neih ve theihna turin Officer te duh zawng ni vak lo lirthei \henkhat Tata Sumo ang chi te lei \hin tawh turin ngaihtuahna sen mek a nih thu a sawi a. Tun dinhmun ah Police Out post pali, Saiha Tlangkawn, Lungbun, Bungtlang South leh Bualpui ah te motor an la nei lo tih a sawi bawk. Home Minister Pu R. Lalzirliana chuan Home Department hnuaiah post ruak, 1500 deuh thaw hnawh-khah lohvin a awm tih sawiin, heng zinga 900 chuang chu Constable post a ni tih a sawi a, sum indaihlohna avangin post ruak te hnawhkhah theih a ni lo tih sawiin, sorkar hmasa in sum mamawh tur chhut lawk lova IR Bn. a din belh avangin Sorkar chuan thla tin cheng vbc 38 zet a sen belh a, post ruak hnawhkhat zung zung turin sum a awm thei lo a ni, a ti bawk.