UN peng te leh Mizoram sorkar thawkdun dawn

Mizoram ei leh bar dinhmun leh khawsak phung chawikang turin Mizoram sorkar leh UN Organisation hrang hrang te an thawkho dawn a, he project hi tun thla ni 16 khian Chief Minister Pu Lal Thanhawla chuan Aizawl-a Vanapa Hall-ah a hawng ang.

He thawhhona tur chungchang hi niminpiah khan NLUP Implementing Board Vice Chairman PL. Thanga chuan Aizawl-ah thuthar lakhawmtute a hrilh a, he project hming atan hian ‘UN Joint Initiative Project’ vuah anih thu a sawi a, UN Organisation hrang hrangte hmalakna tur Detail Work Plan leh budget pawh siam fel tawh niin ruahman lawk ang chuan Project hi cheng nuai 2454 vel anih thu leh Mizoram sorkarin cheng nuai 120 chuang hret a tum ve ang.
    Hei bakah hian Pu PL. Thanga chuan Project kalpui dan tur rua-hmanna felfai tak UN Organisation buatsaih pawh peihfel a ni tawh niin a sawi a, hmalakna tur zingah Mizoram lo neih dan zirchianna te, eizawnna kawng hrang hrang leh an harsatnate, vawk natna PRRS leh ran natna ven dan chung-changte bakah Mau hman \angkai dan leh Skill development mamawh zirchianna te an nei dawn niin a sawi bawk. He project thil tum zingah mirethei harsa zawk ten man tlawm zawka ei leh bar thil an hmuh theihna tur ruahmanna Food Security te, an khawsak phung a harsat lutuk lohna tura ruahmanna Livelihood Security siam te, Energy siamchhuah leh chhehvel boruak, tui leh ramngaw humhalh te a tel a ni.