Oil zawn man cheng vbc. 15 sorkarah chhunglut tawh.

Mizoram a Oil leh Gas zawngtu Company te chuan an thil zawn man (license fee) atan Mizoram sorkar hnenah Rs. 1,52,372,541 an chhung lut tawh.

Hemi chungchangah hian Dr. Lallenmawia, Director, Geology & Mineral Resources Department chuan heng Oil leh Gas zawngtu te sum chhunluh hi license fee vek ala ni tih sawiin, Oil hi laihchhuah a nih hunah chuan a hlawkna hi 50:50 in Central leh State sorkar in an la insem dawn niin a sawi a, “12th Finance Recommendation ruahmanna anga kalpui tum a ni a, a theih tura ngaih a ni mek a, 50:50 in Mizoram chuan a hlawkna a tel pha dawn a ni,” a ti bawk. Tuna an sum chhunluh te hi Hortoki, Meidum leh Bairabi vela Oil zawngtu ONGC-I te chhunluh Rs. 6,39,60,000 te, Chhimlama Oil zawngtu Naftogaz, Reliance & Geopetrol chhunluh Rs. 2,46,09,200 te, hmarlama zawngtu ONGC-II te chhunluh Rs. 13,39,100 leh Maubuang bula leiverh mek Oil India Ltd. te chhunluh Rs. 6,24,64,241 te an ni. Hetihlai hian Meidum bula Gas hmu tawhtu ONGC chuan hnathawh theih veleh Lungdai, Meidum, Hortoki, Pangbalkawn leh a remchang laiah te Meidum bula an verh ang hian leiverh hna hi an thawk leh dawn a, heng hmun ah te hian Gas tam tham tak a awm ngei an beisei a ni. Meidum ah hian Gas 2.2 billion cubic metre a awm ngei tih finfiah a ni tawh a, mithiamte chuan Mizoram-ah hian Gas 100 cubic billion a awm ngei an ring bawk.