Mi 11 rukbo tlanchhuah nan cheng nuai 30 phut

Bru hel pawl leh Tripura-a NLFT hel pawl nia hriatten Zirtawpni kalta (Oct. 10, 2014) zana mi 11 an rukbo te tlanchhuah nan cheng nuai 30 an phut.

Mamit District SP, Pu C. Lalnunmawia sawi danin, heng hel pawl in an rukbo te hi Assam-a Karimganj District-a Partharkandi khaw mi an ni a, a rubotu te hian an chhungte hi mobile phone-a bia-in, an vaia tlan chhuahna atan cheng nuai 30 an phut thu an hrilh a, rubotu te hian a tirah chuan an mi ruk bote hi Contractor emaw an ti a, mahse an rukbo hnuah ni tin inhlawhfaa ei zawng mai an nih thu an hriat leh avangin an vaia tlanchhuahna atana sum an phut hi an titlem leh a ni. An mi ruk bote hi West Phulpui khuaa RMSA building sak meka Contractor, Pu Hranghuaia’n a chhawr lai leh helper atana a lak belh mi \henkhat an ni a, Puja chawlh laia an awmna khua, Patharkandi-a an haw hnuah an hna chhunzawm leh tura Mizoram an rawn pan leh laiin Zirtawp zan khan misualte hian Mamit Dist., Rajiv Nagar bulah an chuanna motor tidingin, an ru bo ta a ni.
    He inrukbona ah hian a tirah chuan misualte hian mi 15 an hruai bo phawt a, an zinga Chakma 4-te chu chhuah lehin, Bengali 11 chu an hreng zui ta a, a thlang lawka Bangladesh ramchhung a an camp lam an panpui ta a ni. Heng mi rubotute hi mi 12 an ni a, an zinga 10 chuan silai an keng niin Police-te chuan sawiin a theih angin an chhui zui mek a ni.