Sorkar pawm chanchinbu nilo a Display Advertisement pe tawhlo turin sorkar ngen.

Mizoram Journalists Association (MJA) chuan sorkar pawm chanchinbu nilo hnena Display Advertisement pe tawhlo turin Mizoram sorkar ngenin hemi chungchang hi an thlirzui tur an sawi bawk.

Hemi chungchanga nimin Aug. 21, 2014-a thuchhuah an siamah MJA Gen. Hqrs. chuan Mizoram Sorkar Department hrang hrang ten kum khat chhunga Advertising & Publicity atana sum an dah hi budget pumpui a\anga chhutin zaa pawisa 8 (pariat) te, a pun ve deuh changin zaa pawisa 10 (sawm) te a ni \hin nia tarlangin, Advertising & Publicity atana sum dah tihpun a nih theih nana kum engemawzat kalta a\anga MJA hmalakna chu a hlawhtling mawh hle niin an tarlang a. Tun sorkar kum kal mek 2014-2015 chhunga Advertising & Publicity atana Sorkar Department 41 te sum dah belhkhawm pawh Rs. nuai 236.41 chauh a nih thu leh Advertising & Publicity atana sum dah a tlem tawh nak alai hian a tam zawk mah tur chu sorkar pawm chanchinbute ni lo hnenah a kal ral nia tarlangin, April - July, 2014 chhunga Sorkar Display Advertisement pekchhuah 285 zingah sorkar pawm chanchinbu hnena pek zat chu 66 chauh a nih thu an tarlang a. A tam zawk 219 chu chanchinbu ni lo Souvenir, Annual Magazine, Veng chanchinbu leh a dang dangah te pek a nih thu an tarlang a.
    Hei vang hian Display Advertisement reng reng Sorkar pawm Chanchinbu ni lo te hnena pe tawh lo turin MJA chuan Sorkar Department hotu lu ber zawng zawngte an ngen thu tarlangin, Sorkar Advertisement reng reng Sorkar pawm chanchinbuah chauh chhuah tur a nih angin, tun chinah, Govt. Approved Newspapers & Magazines ni lova Display Advertisement pek tum an awm leh a nih pawhin lo pawmsak lo turin Information & Public Relations Department chu an ngen a. Department ten an lo pek luih a awm a nih pawhin an Bill Certify sak lo turin a ngen bawk a. I&PR certified loh chung pawha chutiang bill, Treasury a thehluh a awm a nih pawhin, an kal dan pangngaia uluk taka an hnena bill lutte lo check chhunzawm zel turin  Treasury Officer zawng zawngte a ngen nghal bawk. Sorkar pawm chanchinbu ni lova Display Advertisement pek chungchang hi MJA chuan Aizawl leh District Hqrs. zawng zawngah ngun takin a thlir zui dawn tih an tarlang bawk a ni.