Loneitute hman tur Tractor leh Rotavator pekchhuah a ni.

Loneituten man tlawm zawk leh hlawk zawka buh an lo tharchhuah theihna tur a nih beiseiin Agriculture Department chuan nimin khan District hrang hranga loneitute hman turin Tractor leh Rotavator a pechhuak.

Heng Tractor leh Rotavator te pekchhuahna hun hi Aizawl-a Agriculture Office kawt-ah neih niin Agriculture Minister Pu R.Lalzirliana chuan he hun hi a hmanpui a, he hunah hian Pu R. Lalzirliana chuan loneitute hman tur khawl thar pekchhuah a ni leh ta hian sorkarin kuthnathawktute a ngaih pawimawhzia leh an tana theih tawp a chhuahzia a tilang nia sawiin, kuthnathawktuten an mawhphurhna hlen ve thung a \hahnemngai taka hna thawk turin a chah. Sorkar hian kuthnathawktute hman tur Power Tiller, Mini Power Tiller leh Tractor engemawzat a lo pe chhuak tawh tih pawh sawiin, Khawl thar pekchhuah te chu uluk taka enkawl tur leh tu leh fate thlenga \hatpui theih tur khawp a \angkai leh taimak chhuahpui turin a ngen bawk a ni.
    Heng khawl te hi RKVY Stream I hnuaiah Sub Mission on Agricultural Mechanisation (SWAM) kaltlangin Establishment of Farm Machinery Banks for Custom Hiring hnuaiah pekchhuah a ni a, hemi atan hian loneitu intelkhawmte chu Society Registration Act hnuaiah an in ziaklut anga, heng Society te hnenah hian sorkarin man tlawm te in Tractor leh a hmanraw dangte pe in anmahnia inrelbawl tura ruahman a ni. Khawl leina senso hi RKVY Stream-I in za a 75 a tum anga, NLUP lam a\angin za a 15, loneitute intelkhawmten a bak zaa 10 hi an tum ve thung ang. A thawhkhatna atan District 4 ah hmalak phawt niin Aizawl District chhungah Kaihzawl (Saitual/Keifang); Lunglei District ah Ngengrual (Thingfal); Champhai District ah Phaizau (Champhai) leh Tuisen (Khawzawl); Serchhip District ah Zawlpui -I leh Zawlpui-II, Phaidung (N.Vanlaiphai)-ah te hmalak niin heng zau khat zelah hian Tractor (42 HP with Trailer) leh Rotavator pek an ni a. Buh seng hunah buh sengna khawl Self Propelled Paddy Reaper pek leh \heuh an ni ang. Society ah khawlte hi pekchhuah niin anmahni awmna DAO \heuhte kaihhruaina hnuaiah inrelbawl dan tur an duang ho dawn a ni.