Kumin ah Gas bur 17,226 chauh thlen vangin Serchhip khawpui ah eirawngbawlna Gas a harsa.

Serchhip khawpui a eirawngbawlna Gas harsatna chuan ziaawm lam ala pan thei meuhlo a, kumin January thla a\anga nimin 6th June, 2014) thleng khan Gas hi Serchhip-ah bur 17,226 a rawn thleng tawh a ni.

Serchhip-ah hian eirawngbawlna Gas Agent hi pakhat (1) chauh awmin Mizofed in Serchhip leh a chhehvel khaw \henkhat hi an enkawl a, Mizofed Serchhip Branch hnuaiah hian eirawngbawlna Gas hmangtu (Consumers Card nei) mi 9022 awmin heng mite tan hian thla tin gas Trip 15 vel chu thleng thei se harsatna hi thleng lo tur a nih thu Mizofed LPG Ser-chhip Branch Manager, Pu Lalrinthanga chuan a sawi a, eirawngbawlna Gas Trip khat ah hian a tlangpuiin Gas bur, a man tlawma mipuite hman theih tura semchhuah hi bur 306 vel awmin kumina Gas thlen tam ber thla February thla khan bur 3942 a rawn thleng a, a thlen tlem ber thla May thla khan bur 2340 chauh rawn thlengin tun June thla bikah hian bur 1152 a rawn thleng tawh a, kumin January thla khan bur 3474 rawn thlengin March thla ah bur 3024 a rawn thleng bawk a, April thla khan bur 3294 a rawn thleng bawk a ni.
    LPG Mizofed Serchhip Branch Manager, Pu Lalrinthanga chuan Gas Cylinder thlen tlem avanga consumer ten harsatna an tawk chu pawi a tih thu sawiin, Gas harsatna hi Serchhip District chhungah bik chauh ni lovin, Mizoram mai bakah India ram pumah harsatna namen lo kan tawk mek tih a sawi a; Gas Cylinder te hi subsidized vek an nih avangin leh International Market-ah India pawisa hlutna a tlakhniam zel avangin India rampawn a\anga Gas kan lakluh hi a tlem tial tial a ni tiin, hei hian ramchhung kil khawr ber thlengin a nghawng vek a ni, a ti a. Kan ram \henawm, leilung hausakna haichhuak tama kan hriat, Tripura chungchang pawh sawilangin thlakhata an mamawh zat Truck trip 677 vel a nih \hin laiin tun dinhmunah chuan trip 320 vel chauh an hmuh theih thu leh hetiang harsatna hi hmarchhak ah State hrang hrangte pawhin an tawk mek tih sawiin, mipuite hriatthiamna leh dawhtheihna ngenin, theihtawp chhuaha \an an lak reng thu a sawi bawk.