Persons with Disabilities Act hman hnuah Mizoram-a rualbanlo 44 sorkar hna pek an ni tawh.

Persons with Disabilities Act Mizoram-a kalpui mek ah kum 1996 a\ang khan Mizoram-ah pianphunga rualbanlo mi 44 te chu Mizoram sorkar hna a lak an ni tawh.

He thu hi Mizoram-a Persons with Disabilities Act kalpui dan a hmuna enfiah tura rawn kal, sorkar Laipui-a Ministry of Social Justice & Empowerment-a Chief Commissioner for Persons with Disabilities, Pu Prasanna Kumar Pincha leh Mizorama pianphunga rualbanlote enkawl leh buaipuitu pawl hrang hrang 7 aiawhte inkawmna nimin May 21, 2014-a State Guest House, Conference Hall, Aizawl-a neih ah tarlan a ni a. He huna tarlan a nih dan chuan chhiarpui (Census) 2011-a chinchhiah danin Mizoram pumah pianphunga rualbanlo 15,160 an awm a, heng zingah 8627 chu Zokhaw lama awm niin 6533 chu khawpui a awm an ni a. An zingah hian kut leh ke lama harsatna nei Orthopedically Handicapped (Locomotor) 1976; rilru chaklo leh rilru lamah harsatna nei (Mental Retardation) 1585; khaw eng hmu lo (Visual Impairment) 2035; beng hriatna lamah harsatna nei (Hearing Impairment) 3354 leh rilru natna nei (Mental Ilness) 1050 te an ni a. Tun thleng hian mi 8362 hnenah pianphunga rualbanlohna lehkha Disability Certificate pek an ni tawh bawk a ni.
    Pianphunga rualbanlo tan hian Mizoram pumah sikul bik Special School 8 a awm a, Aizawl-ah School 3, Kolasib-ah School 2 leh Lunglei, Serchhip leh Saiha ah te pakhat \heuh a awm a. Chungte chu Aizawl a Gilead Special School (zirlai 284); Special Blind School (zirlai 28) leh Moriah Blind School (zirlai 11); Kolasib a Special School for the Mentally Handicapped (zirlai 66) leh Integrated Blind School; Lunglei-a Special School for Persons with Disabilities (zirlai 60); Serchhip a Shalom Special School (zirlai 40) leh Saiha a Mary Hechia Residential Special School (zirlai 30) te an ni. Kum 2012-2013 khan pianphunga rualbanlo zirlai 803 hnenah Children with Disabilities Scholarship pek a ni a, 2013-14 khan hetiang Scholarship hi zirlai 788 hnenah pek a ni bawk. Mizoram puma sikul 2356 ah hian pianphunga rualbanlote kalna bik ramp siam ni tawh in heng ang hi zirna In sang ah chuan Pachhunga University College leh Mizoram University ah te chauh siam a ni.