Mizoram-a Polling Station 385-ah VVPAT hmang dawn.

Tun thla ni 9-a Mizoram a Lok Sabha seat khat atana inthlanna neih turah Polling Station awm zawng zawng 1126-ah Electronic Voting Machine (EVM) hman a ni dawn a, amaherawhchu heng zinga Polling Station 385-ah chauh Voter Verifiable Paper Audit Trail (VVPAT) hman a ni dawn.

Vote thlaktuten vote an thlak hnu lawka an vote thlakna an finfiah nghal theihna, VVPAT hman tur chungchangah hian Election Commission chuan niminpiah (3rd April, 2014) tlai khan Mizoram Chief Electoral Officer hnenah hriattirna ziakin a pe a. VVPAT hmanna tur te chu, Aizawl khawpui chhunga Polling Station zawng zawng, District Hqrs. hrang hrang, Mamit, Kolasib, Champhai, Serchhip, Lunglei, Lawngtlai leh Saiha khawpuia Polling Station zawng zawngah leh Civil Sub-Divisional Hqrs. thlanchhuah panga, Saitual, Khawzawl, Vairengte, Thenzawl leh Hnahthial-ah te hman a ni dawn a, mahse heng bial chhunga Polling Station zawng zawngah hian hmang lovin Vairengte I-VIII P.S, Saitual I-V P.S, Khawzawl I-VIII P.S, Keifang Tlang P.S, Thenzawl I-VI P.S leh Hnahthial I-VI-ah te hman a ni anga,Hrangturzo bial Assembly Bye-election ah chuan hman a ni lo ang.
    VVPAT hmanna tur Polling Station-te tihchian a nih tak avangin CEO chuan District hrang hranga Bawrhsap, District Election Officer ni bawk te chu inthlanna buaipuitu tur te training \ha taka pe tur leh VVPAT awm zia leh hnathawh dan mipui ten an hriat theihna tura beihpui thlak \an turin a hriattir a ni. CEO Pu Aswani Kumar sawi danin, mipuiten VVPAT awm dan leh hnathawh dan an hriat theih nan All India Radio, Doordarshan leh Cable TV-ah te mipuite zirtirna pek tum a ni a ti bawk. VVPAT hi vote thlakna khawl, EVM nena thlun zawm a ni a, vote thlaktu in vote a thlak zawh veleh VVPAT hian vote thlaktu vote thlakna candidate hming leh a chhinchhiahna hmuh theihin a rawn tarlang a, hei hi vote thlaktu chuan lo enin, a vote thlakna dik leh dikloh chawp leh chilhin a finfiah thei a ni. Amah-erawhchu, VVPAT bawm chhunga vote thlakna tarlanna lehkha erawhchu vote thlaktu hian a la chhuak tur a ni lo a ni.