Kum 2013 chhungin Cancer thihpui tam ber.

Health Department chhinchhiah danin, nikum 2013 chhunga Mizoram-a thihna thlentu tam ber chu Cancer natna niin, nikum chhung khan cancer thihpui Mizoram-ah mi 683 an awm.

Health Department in Mizoram-a thihna thlentu langsar zual panga a tarlan zingah Cancer natna dawta thihna thlentu tam ber chu Malaria niin, hemi hun chhung hian Malaria vanga thi mi 552 an awm a, Thawhah leh Khuh benvawn vanga thi 527 awm bawkin, Pnuemonia thihpui 445 leh Pumpui leh Ril fang na vanga thi mi 203 an awm bawk.
    Mizoram Population Based Cancer Registry (PBCR) Report thar ber 2013, Indian Council for Medical Research (ICMR)-in an chhut chhuah tarlan danin kum 2 chhunga Mizoram-a Cancer hmuhchhuah thar zat chu 2483 (mipa 1376 leh hmeichhia 1107) an ni a, hemi hun chung vekah cancer vanga thi zat chu 1330 (mipa 798 leh hmeichhia 532) an ni. Mizoram-a mipa cancer hluar zual 5 te, a tam dan indawt chu – Stomach (pumpui) 23.5 %; Oeso-phagus (chawdawt) 14.5 %; Lung (chhuap) 13.9 % leh Hypopharynx (hrawk hnuai) 4.7 % te an ni. Mizorama hmeichhia cancer hluar zual 5 te, a tam dan indawt chu-Lung (chhuap) 16.9 % Stomach (pumpui) 13.7 %; Cervix (chhul hmawr) 13.2 %; Breast (hnute) 11.2 % leh Oeso-phagus (chaw dawt) 4.1 % te an ni.