Hremna na zawk pe turin PRISM in ngen

PRISM chuan Mizoram Chief Secretary hnenah lehkha thehlutin mipui sum cheng nuai 60 tichingpena puh H. Laldova’n hremna na zawk a hmuh theih nana hma la turin an ngen.

Nimin lama tarlan tawh angin March 31, 2014 khan Chief Judicial Magistrate chuan kum 1998-a Chakma Rest House, Lunglei-a Liaison Officer anih laia cheng nuai 60 chingpen a puh, H. Laldova chu kum khat lung In tang tur leh Rs 1,000 chawi turin a ti a. Hemi chungchangah hian PRISM chuan thuchhuah siamin Indian Consumer Price Index a\anga chhuta 1998 a\anga 2014 chhung average inflation rate 7.14 % anih avangin kum 1998-a cheng nuai 60 chu tunlaiah chuan cheng nuai 168 vel zeta tam a ni tawh tih tarlangin, chuvang chuan H. Laldova hian lung In-a a tan hian a thlawna ei leh in a dawn dawn mai bakah nitin Rs. 46,027/- vel a hlawh zel dawn ang a ni, an ti a. Heti khawpa mipui pawisa tam tihchingpenna hremna hi a nep ni mai lovin inhlawhna hlawk tak ni zawk hialin a lang thei tih tarlangin, chuvang chuan Chief Secretary hnenah lehkha pein hun rei zawk lung In a tan theih nana hma la tur leh ‘The Mizoram Public Servant Personal Liability Act, 2010’ hmanga a eiruk ai rulh tir turin an ngen tih an tarlang bawk. Hei bakah hian PRIMS thuchhuah chuan ‘Eiru’ hremna hi tuna Dan kan hman lai te-ah hian a nep hle tih tarlangin, eirute hrem an ni \hin lo leh hrem an nih chhun pawha hremna a nep lutuk avang hian eirukna hi a tam tial tial reng niin an tarlang a. Chuvang chuan, tuna Mizoram sorkarin a duan lai ‘The Mizoram Lokayukta Bill, 2014’-ah pawh eiru te na zawka hremna tur provision belh turin sorkar ngenin an nawr thu leh tun thlengin na zawka eirute hremna tur provision hi sorkar chuan ala siam duhlo niin an tarlang bawk.