Latest News

Serchhip-ah Northeast Yatra for Lifestyle (Life) nei mek

Image
India hmarchhak State 8-a tun thla (November) chhunga neih tura ruahman Northeast Yatra for Lifestyle (Life) chu kar hmasa lamah Mizoram tana a hawnna hun hman a nih hnuin Serchhip District-ah pawh kalpui mek a ni a. He Yatra neih chhung hian mipuite hnenah tam zawk leh zau zawkin ‘environment’ humhalh leh venhim pawi-mawh zia zirtirna pek tura ruahman niin tunah hian In tin-a lut lawrin hemi chungchang inzirtirna neih a nih bakah thuziak te sem a ni a. Vawiin hian North Vanlaiphai-ah Mass Rally neiin hman khat daih Plastic thenfai hnatlang neih nghal a ni anga, naktuk-ah Govt. Serchhip College-ah hemi chungchang inzirtirna hi neih leh a ni ang.

Lok Sabha inthlanpui neih turah voters 7,00,422 awmin Polling Station 1,126 a awm dawn.

Thla thar ni 9-a Mizoram-a Lok Sabha inthlanpui neih turah vote nei thei mi 7,00,422 an awm mek a, heng mite vote thlakna tur hian Polling Station 1,126 siam a ni ang.
Rampuma Parliament inthlanpui neih tur ruala Mizoram Parliamentary Constituency inthlanpui neih tur chungchangah hian he inthlanna a Returning Officer tur, Dr.Franklin Laltin-khuma, Aizawl DC chuan nimin khan a Pisa-ah thuthar lakhawmtute kawmin hemi chungchang hi a sawi a. He inthlanpui neih turah hian Mizoram pumah vote nei thei mi 7,00,422 awm mekin heng te hi Aizawl District-ah 2,62,229, Mamit District-ah 58,408, Kolasib District-ah 52,292, Champhai District-ah 79,155, Serchhip District-ah 45,734, Lunglei District-ah 96,054, Lawngtlai District-ah 72,106 leh Saiha District-ah 34,444 te an ni a. Mizoram-ah hian Polling Station 1,126 awmin Aizawl District-ah Polling Station 323, Mamit District-ah 110, Kolasib District-ah 76, Champhai District-ah 133, Serchhip District-ah 77, Lunglei District-ah 175, Lawngtlai District-ah 159 leh Saiha District-ah 73 a awm a ni. He inthlanna neih turah hian Aizawl DC,  Dr.Franklin Laltinkhuma chu Returning Officer niin District dang zawng Deputy Commissioner te chu Asst.Returning Officer an ni anga, Aizawl District-a Addl. Deputy Commissioner pahnihte chu Asst. Returning Officer an ni bawk a ni.
    He inthlanna neih turah hian ECI thupek angin inthlana Candidate te sum hman dan thilthlai tur Flying Squad, Static Surveillance Team, Video Surveillance Team, Video Viewing Team leh Accounting Team te din a ni ang a. Print leh Electronic Media a campaign nana candidate leh party-te sum senfo enfiah tur Media Certification and Monitoring Committee din a ni bawk ang. Mizoram Parliamentary Constituency a candidate sum hman theih zat chu cheng 70,00,000 thleng phalsak an ni.

Comments

Popular News (Last 30 Days)