Hmarchhak hmundangte rualin Vawiin ah Serchhip-ah Mega Mock-Drill neih a ni dawn.

India Hmarchhak State dangte rualin Vawiin hian Serchhip-ah Chhiatrupna thlen thulh a hmalak dan tur a tak anga lantirna, Mega Mock-Drill chu neih a ni dawn a, ruahmanna peihfel a ni tawh.

Vawiin a Serchhip-a Mega Mock-Drill neih tur hi Mizoram chhim lam District 4 - Lunglei, Serchhip, Lawngtlai leh Saiha District te tan a ni a, hemi atan hian Serchhip khawpui huamchhunga hmun hmun nga (Serchhip Bazar Building, JN Hospital, Sesah Residential Area, New Serchhip Supply Godown leh a chhehvel leh DC Office Complex) thlan chhuah a ni a, heng hmun thlanchhuah te viltu tur Incident Response Team leh an Commander tur \heuh pawh ruat fel vek tawh a ni a, New Serchhip YMA Hall leh a chhehvelah Relief Camp siam a ni ang a, Staging Area atan Leisekawt Field hman a ni bawk ang. Mega Mock-Drill a hman tur motor leh Ambulance bakah hmanraw pawimawh zawng zawng te pawh ruahman fel vek a ni tawh bawk a ni.
    Vawiin a Serchhip-a Mega Mock-Drill neih tur hi chawhma dar 11:30 ah \an tura ruahman niin khawpui chhung hmun hrang hrangah ‘Siren’ tih rik a nih dawn a, he Mega Mock-Drill ah hian National Disaster Management Authority, State Disaster Management Authority leh District hrang hrang a\anga Observer 18 bakah National Disaster Response Team te, State Disaster Response Team te, Mizoram Police, 14 Assam Rifles, Sorkar Department hrang hrang bakah Volunteers 100 chuang an tel dawn a, chawhnu dar 1:00-ah chuan zofel vek tura beisei a ni. Vawiin a Mega Mock-Drill neih tur chungchangah hian District Bawrhsap, Pi Juhi Mukherjee chuan mipuite chu chi-ai lo tura chahin, he Mega Mock-Drill hi ngai pawi-mawha \ha taka thlawp turin mipuite chu a ngen bawk a ni. India hmarchhaka Mega Mock-Drill neih tur hi chhawng hnih-ah \hen niin a hmasa chu March 10, 2014 khan neih a ni tawh a, Vawiin hian Mizoram a Aizawl leh Serchhip bakah Silchar (Assam), Dimapur leh Kohima (Nagaland),  Imphal leh Thoubal (Manipur) leh Agartala leh Ambassa (Tripura) ah te mega Mock-Drill hi neih a ni bawk ang.