Feb. 28 hmaa Mizoram-a Lokayukta din turin Sorkar in chak takin hma a la mek.

Law Minister Pu Lalsawta chuan AICC duhdan angin eirukna chhui-a hremtu tur Lokayukta chu February ni 28 hmaa Mizoram-a din ve tuma hmalak mek a ni, a ti.

Lokayukta chungchangah hian Law Minister chuan Mizorama hman tur Lokayukta dinna tur dan chu duan zawh a ni tawh a nih thu sawiin, a taka tihpuitlin harsatna ber tur chu sum leh pai lamah a nih thu a sawi a, Lokayukta dinna tur dan duan mek ah hian Chief Minister leh Minister te pawh chhui-a hrem thei tur Lokayukta din tum a nih thu sawiin, sorkar emaw thunun hauh lohva eirukna chhui leh hrem thlenga thuneihna sang tak nei, sorkar leh engmahin a thunun loh eiruk dotu pawl din tum a ni, a ti a. A chhuitu hi ACB emaw sorkarin a thunun theih leh a hnuaia awm hman a nih chuan Lokayukta \ha a ding thei dawnlo nia an hriat thu sawiin, an duhdan taka kalpui tur erawh chuan sum leh pai a ngai tam dawn hle a, Lokayukta ber chu High Court Chief Justice tlukpui leh member dangte pawh High Court Judge tlukpui an nih bawk chuan an hlawh ringawt pawh tam tham a ni dawn a ni, a ti.
    Law Secretary Pu P. Singthanga chuan he dan hi hmanhmawh taka hman a nih dawn chuan a \ul dan anga Ordinance pawh siam theih mai anih thu a sawi a, tuna an duan chhin danah chuan Lokayukta ber leh member-te hi kum 5 term atana ruat an ni ang a. Sorkarin a ban thei lovang a; an hna an chawlhsan hnu-ah sorkar hnuaiah hna an thawh phal a ni tawh lo bawk ang.