Mizoram Legislative Assembly House-ah Larsap thusawi-a lawmthu sawina Motion pawm.

Nithum awh Mizoram Legislative Assembly 7-na \hutkhawm vawikhatna chu nimin khan tiamchin awm lova tihtawp a ni a, niminpiah a House chhunga Larsap thusawi chungchanga lawmthu sawina Motion chu sawiho a nih hnuah pass a ni.

Nimin a Assembly Session-ah hian niminpiah-a Governor Pu Vakkom Purushotha-man-a'n House-a a thusawi chungchanga lawmthu sawina Motion, Congress Member Pu Chalrosanga putluh chu sawiho niin Motion puluttu hian sawihawngin, Mizoram mipuiten Sorkar thar lo ding leh taah beiseina sang tak an neih chu tihhlawhtlin ngei a nih a rin thu a sawi a. Mizoram Assembly Inthlanna neih tawha vote tlak \hat ber tum a ni te, boruak muanawm tak hnuaia inthlanna zawhfel a ni ta te chu thil chhinchhiahtlak a ni, a ti a, ‘Dikna, Rinawmna leh Eirukna Do ngam Sorkar chu mipuite beisei a nih angin Sorkar chuan hemi kawngah hian chak takin hma a la mek tih Governor in a sawilang chu a ropui hle a ni,’ a ti a, Member te chu a motion putluh pawmpui turin a sawm nghal bawk.
    He sawihona hunah hian member 8 ten thu sawiin an thusawite hi House Leader Chief Minister Pu Lal Thanhawla chuan khaikhawmin NLUP chu party dang te pawhin an tuipui hle a, campaign naah pawh NLUP sawi lo an awm lo tih a sawi a. NLUP Special Package chu pawh pen theih a ni lova, sorkar hnathawk hlawhin a tuar lova, hetianga sawi darh ching hmui daw thei pu mi chu inthlannaah pawh an tla duh a ni, a ti a, hetianga sawi ching hi sorkar hnathawk zingah an awm a nih chuan hrem an ni ang, a ti bawk. Chief Minister chuan, inthlan dawn apianga Mizoram tibuai zawnga che \hinte chu ngaihtuahna thar nen dawr an ngai tih sawiin, ZRA leh HPC (D) pawl te chu sorkar tharin an chungchang a ngaihtuah a ngai ang, a ti a, inrukbo te chu inpuhmawhna chi a ni lova, helho thilphut ang pek a nih chuan naktukah pawh rawn ti leh rawh u tihna ang a nih dawn avangin tuna rukbo mek te pawh ralthuam hmang lova chhanchhuah dan zawn mek a ni, a ti. Opposition Group Leader Pu Vanlalzawma chuan eptu an nih vanga sorkar do ngawt tur an ni lo tih chu a mimal ngaihdan a nih thu leh sorkar finchhuah tur nia a inngaih thu a sawi bawk. Hemi hnu hian Member zingah remtilo awm lovin he Motion hi lungrual taka pawmtlan a ni.