Assembly Deputy Speaker atan Pu R. Lalrinawma thlang.

Nimin a Mizoram Legislative Assembly \hutkhawm ah Aizawl East-I bialtu MLA, Pu R Lalrinawma chu Deputy Speaker atana chuhtu awm lovin tlingah puan a ni.

Nimin a Assembly \hutkhawm ah hian Speaker, Pu Hiphei chuan Deputy Speaker atan hian niminpiah tlai dar 3:00 thleng khan hming pekluh theih a nih thu leh hetah hian Pu S. Laldingliana chuan Pu R. Lalrinawma rawtin hei hi Dr. Ngurdingliana chuan a thlawp thu a sawi a. Hetianga hming lut dang a awmloh avang hian Pu R. Lalrinawma chu chuhtu dang awm lovin Deputy Speaker atan thlantlin a nih thu a puang a ni. House Leader leh Chief Minister ni bawk Pu Lal Thanhawla chuan Pu R Lalrinawma thlantlin a ni chu lawmawm a tih thu a sawi a, Law Commission Chairman hlui hi Mizorama dan hremi zinga mithiam ber pawl anih thu leh amah avang hian an sorkarin dan lamah pawh hriat tam tak an neih thu a sawi bawk. Eptu pawl Group Leader Pu Vanlalzawma pawhin Deputy Speaker thlan thar chu a lawmpui thu a sawi a, Mizoram-a dan hremi, mithiam Deputy Speaker atana thlantlin anih chu lawmawm a tih thu a sawi bawk. Pu R. Lalrinawma hi kum 53 a upa a ni a, thiamna lamah chuan MA (Economics) leh L.L.M a ni a; MLA a nih hma hian Ukil hna a thawk a ni. Kum 2008 Mizoram Assembly inthlanpui-ah khan Aizawl East – I bial a\angin Congress ticket-in thlantlin a ni a. Kumin Assembly inthlanah khan a bial ngai bawk a\ang hian thlan tlin nawn leh a ni.