Tripura Transit Camp 6-ah vote thlak zo. Voter za zela 74.34 ten vote an thlak.

Tripura Bru Transit Camp 6 a vote thlak chu nithum neih a nih hnuah nimin khan zawhfel a ni a, heng camp hrang hrangah te hian vote zaa 74.34 a tla tih Election Department chuan an sawi.

Tarlan tawh angin Tripura Bru Transit Camp 6-ah hian ni 2 chhung vote thlak anih hnuah leh vote thlak hun tlai dar 4:00 a khar tura tih chu khar lova darkar khat chuanga an pawhsei hnuah pawh vote thlak zawh hman anih loh avangin Election Commission-ah nimin a vote thlak chhunzawm turin hun dil belh a ni a, Election Commission phalnain Bru vote thlak hun hi nimin atan pawhsei leh a ni. Election Department-in bial hrang hranga vote tla a chhinchhiah danin, Hachhek biala vote 5,166-ah vote 4075 (78.88%) a tla a, Dampa 843-ah 621 (73.67%), Mamit-ah 2961-ah 1925 (65.01%) a tla a, Tuirial-ah 634-ah 436 (68.77%) a tla a, Kolasib-ah 426-ah 308 (72.30%) a tla a, , Serlui-ah 747-ah 632 (84.61%) a tla a, hei hi a \ha ber a ni. Lunglei South-ah 20-ah 12 (60%) a tla a, Thorang-ah 275-ah 213 (77.45%)  leh W. Tuipui-ah 447-ah 342 (76.51%) tla a,  Lawngtlai W-ah vote 1 awmin a thlaklo thung.
    Nimin khan Tripura Transit Camp pathum, Hamsapara, Kaskau leh Khakchangpara a\angin Ballot Box 14 chuan Mamit thlengin Mamit District Election Officer Pu V. Lalrem-thanga hovin Returning Officer-ten an lo dawng a, tunah hian DC Office-a Strong Room-a abika buatsaihah dah luh nghal a ni a, nizan khan Tripura Transit Camp hrang hranga Ballot Box-te chuan Mamit an rawn thlen kim beisei a ni a, Strong Room hi Manipur a\anga lokal CPMF te’n uluk takin an veng a ni. Bru Vote thlakna camp hrang hrangte hi Naisingpara, Asapara, Hazacherra, Damcherra, Kaskau, Khakchangpara, leh Hamsapara te a ni a, Election Department-in a chhinchhiah dan chuan heng camp 6-ah hian vote nei 11,346 an awm a, heng zingah hian Mamit District mi tam berin voter 8,799 an awm a ni.