Latest News

Shalom School kum 8 tlin lawmna CM in hmanpui
Shalom Special School for Spastics in kum 8 a tlinna puala Pathian hnena lawmthu sawina hun nimin (9th August, 2013) a New Serchhip YMA Hall-a an buatsaih chu Chief Minister, Pu Lal Thanhawla chuan a hmanpui.

He hunah hian Chief Minister chuan Lal Isuan, “Nangmah i inhmangaih ang bawkin i vengte hmangaih rawh” tih nunpui tak tak tute tan lo chuan ‘Vohbikte’ hmangaih tak taka enkawl hi thil theihloh a ni tih sawiin, lainatna, hmangaihna, khawngaihna, duhsakna leh inpekna thinlung neih a ngaih thu sawiin; rualbanlote chhaih nawmnah chingte hi ‘mi tawmkailo’ an ni tiin; Mizote hian rualbanlote enkawl dan thu ah zirtur kan la ngah hle ni a a hriat thu sawiin; Vohbikte hian duhsaktu leh hmangaihtu an hre em em a, hlamchhiah leh auh nawmnahte hi hnam changkanglo zia anih thu a sawi. Rualbanlote chu Lal Isua ‘Vohbikte’ an nih avangin Lal Isua Lalna ram apiangah chuan duhsaktu leh tanpuitu an hmu zel dawn ani a ti a, vohbikte hmasawn leh changkanna hi ram leh hnamin kan chhawr bakah khawvel hmuh a kan hmel ti tha tu anih vangin; zirtirtute leh anmahni enkawltute mai nilovin, khawtlangin tangruala ‘Vohbikte’ hmasawnna tura tan lak a pawimawh thu a sawi a, Spastic Society of Mizoram leh Shalom Spastic Society, Serchhip District dintu te leh hruaitute chungah Mizoram leh hnam ang pawhin lawmthu sawi kan ba a ni a ti bawk.
Shalom Special School hi kum 2005, August ni 9, khan a hun laia bialtu MLA Pu Lal Thanhawla hovin din a ni a, Serchhip VC-III Hall-ah School bultan niin zirlai pasarih an nei a, School din tan tirh anih atanga kum khat chhung atana zirtirtute hlawh hi Pu Lal Thanhawla, MLA chuan a tumsak vek a ni. Tun dinhmunah zirlai 40 leh zirtirtu 3 an awm mek a, New Serchhip VC te’n School hmun rem tak an pek ah 14 Assam Rifles ten School building tha tak an sak sak tawh bawk a; zirlaite hi Serchhip bakah a chhehvel khaw hrang hrang Chhingchhip, Thenzawl, Keitum, North Vanlaiphai etc., atangin an awm a ni. School hi a bul tan anihin nikhatah vawi thum (Thawhtanni-Nilaini) an kal a, tunah chuan kar tluanin an kal tawh bawk a ni. Shalom Special School atanga zirchhuak thenkhat mahni a eizawnna bul thei khawpa thiamna nei an awm tawh a, puan thui thiam te awmin, tunah hian training  mek pahnih an awm bawk. Zirlaite hi talent tha tak tak nei niin Infiamna lamah pawh Shillong thlengin an fehchhuak tawh a ni.
Serchhip-a Sawrkar Department hrang hrang ten he School hi an tanpui thin a, Chief Minister –in School naupangte phurh kual na tura a pek Maruti Van a hman tur petrol leh tul dang te an tum sak thin a, BSNL in Telephone a thlawnin a thlun sak bakah a hman man a free a, PHE EE, Serchhip-in a thlawnin tui a pe bawk a, DLAO Serchhip-in naupangte infiamnan District park a thlawnin a hmantir thin bakah Sawrkar Department hrang hrangte anmahni hmangaih leh tanpuitute, mimal leh pawl hrang hrang mi thahnemngaite chungah Spastic Society, Serchhip District chuan lawmthu a sawi a ni.
Vawiin Pathian hnena lawmthu sawina inkhawmah hian Serchhip District Bawrhsap Pi Juhi Mukherjee, IAS te, Spastic Society of Mizoram Secretary Pi Chhingpuii leh 14 Assam Rifles Commandant te pawhin thu an sawi a, ‘Vohbik’ ten Recitation, Action Song leh Skit an entir chuan mipuite thinlung a hneh hle a ni.

Comments

Popular News (Last 30 Days)