Union MoS hlui Dr. Bhagwat Karad-a’n Serchhip-ah BJP District Office hawng
Serchhip-a BJP Office thar hawnna hunah hian Mizoram State BJP enkawltu leh Union Minister of State hlui, Dr. Bhagwat Karad chuan Mizoram Chief Minister lo ni tawhin kum 25 chhung a lo enkawl tawh leh tun dinhmuna Mizoram Chief Minister ni mek Bial-a BJP-in District Office an hawng thei chu lawmawm a tih thu sawiin, BJP Mizoram Sate leh Serchhip District-a BJP hruaitute pawh duhsakna a hlan a. BJP chu chhungkaw inthlahchhawng leh chhungkaw bil Party an nih ve loh thu leh Party Worker-te ta liau liau a nih thu sawiin, “Helai ah te tak tê ni mah ula khawvela party member ngah ber, MP ngah ber, India ram State tam bera sawrkarna siam thei leh MLA leh VC ngah ber Party an ni,” tiin hei hi hre reng turin an party mi kalkhawmte chu a chah a, “BJP thupui chu ‘A hmasa berah ram leh hnam’ a ni a, a dawtah Party niin a pathumna ah keimahni kan ni,” tiin hei hi hre reng tur leh BJP Serchhip District Office chu mipui rawngbawlna tur hmun a nih ang ngei a tangkai taka hmang turin a chah bawk.
Hei bakah hian BJP chuan Mizoram leh Serchhip District mipui tan Health, Education leh thalai hna nei lo te tan hna tam zawk siam a tum tih pawh Dr. Bhagwat Karad chuan sawiin, Prime Minister Narendra Modi pawhin India ram mipuite thlei bik nei lovin a kaihruai mek a, Railway leh Road Infrastructure-ah pawh sawrkar tawhte lêt 3-in hma a sawn mek tih a sawi a, “Kei ngei pawh Mizoram hian State dang hmasawn rualin hma a sawn theih nan Mizoram vil turin min dah a, chutiang tur chuan theihtawp kan chhuah tlang zel ang,” a ti bawk.
A sawi zelnaah Dr. Bhagwat Karad chuan BJP chu mi thenkhatte sawi anga hlauhawm a ni lo tih sawiin, “India rama Party upa ber Congress Party chuan eng inthlanah mah a khin hneh loh avangin anmahni dawt phuahchawp hmangin BJP an bei mek a ni,” a ti a, Special Intensive Revision (SIR) chungchang pawh sawiin, “Kum1952 atanga 2025 inkar-ah SIR hi tum 12 neih a ni tawh a, tum 12 zinga tum 10 chu Congress kaihhruai sawrkar hnuaiah neih a ni a, Election Commission of India chu Election process thianghlimna vawng him tura Danpui-in mawhphurhna a pek a ni. Representation of the People Act, 1950 Section 21(3)-in Electoral Roll ennawnna bik (Special revision) chungchang a sawi angin Dân ang taka hmalak a ni,” a ti a, “Congress sawrkar laia SIR kalpui chu Administrative hna dik tak a nih chuan engvangin nge BJP sawrkarin SIR a kalpui chu democracy beihna anga an chhuah tak mai ni?” a ti a, “BJP chuan Development chiah kan buaipui Serchhip District BJP-ten Thenzawl Peace City chungchangah State sawrkar hmalakpui tura in rawn ngenna pawh State Chief Minister bulah ka sawi lang tawh a, kum 2028 inthlan thlir chungin theihtawp kan chhuah ang,” a ti bawk.
Serchhip District BJP Office hawnna hun hi Serchhip District BJP President James Zothanpuia chuan a kaihruai a, BJP State Vice President JB.Rualchhinga chuan thu a sawi bawk a, Serchhip District Constituency pathum atanga BJP-a member lawmluh thar mi 75-te hming puan niin lawmluhte atangin thusawi ngaihthlak a ni bawk.
He hun hi BJP Mizoram State hruaitu pawimawh tak takten an telpui bakah District Office hawnna hun hman zawh hian Democracy humhimna kawng zawh (Short Rally) an nei nghal bawk a ni.