Thenzawl Vengthar VC by-election atan Dec. 8-ah Vote thlak a ni dawn
Hemi chungchanga SEC in nimin-a thuchhuah a siamah chuan he Village Council-a Inthlanna neih hun tur nimin a SEC in a puan a nih rual hian Returning Officer chuan Inthlan hriattirna tichhuak nghalin Inthlan chuh tumte tan hming pekluhna hun hawn nghal a ni a, he inthlan chuh tumte tan November ni 12, 2026, tlai dar 3:00 thleng hming pekluh theih a ni ang. Heng hming pekluh te hi November ni 13-ah endik an ni anga, inhnukdawk duhte tan November ni 16, 2026, tlai dar 3:00 thleng hun hawng lehin December ni 8, 2026, zing dar 7:00 atanga tlai dar 4;00 thleng vote thlak a ni anga, vote thlak zawh veleh Vote tla te chhiar zui nghal a ni ang. Vote thlak that a ngaih chuan December ni 9-ah thlak that leh tur a ni anga, inthlannaa buaipui ngai zawng zawngte (Election process) chu December ni 15, 2026-ah zawhfel vek tur a ni ang.
Tarlan tawh angin Thenzawl Vengthar VC-ah hian Seat pathum (3) awmin Inthlanpui neih hnuhnung berah khan MNF chuan Seat awm zawng zawng an la a, he VC hi chhan engemaw a awm avanga thiah a nih tak avangin Inthlanna hi neih leh tura ruahman niin nimin-a Inthlanna neih hun tur puan a nih rual hian Thenzawl Vengthar VC huamchhungah hian Model Code of Conduct (MCC) hman tan nghal a ni a, hei hian inthlan result puan thleng a huam ang.
Nimin-a State Election Commission in Thenzawl Vengthar VC by-election neih hun tur a puan rual hian Mizoram chhung VC thenkhat a by-election neih hun pawh puan nghal niin heng VC hrang hrangah hian a rualkhaiin by-election hi neih tur a ni a. By-election neihna turte hi Champhai District-a Vapar VC, Mamit District-a Rengdil VC leh Khawzawl District-a Ngaizawl VC bakah MADC hnuaia VC 7-ah te a ni.