Serchhip Road Protection Squad ten Kawnpui VC-a kawng dinhmun endik

Serchhip Road Protection Squad (Team-III) te chuan nimin khan Serchhip Kawnpui VC area-a kawngpui dinhmun te hmunah kalin an enfiah.
He Team fehchhuak te hi Team Leader leh District Urban Development Officer (DUDO) Gaston Vanlalhriatpuia chuan hovin DIPRO R. Vanneih-tluanga leh khawtlang hruaitute an kal bawk a. Mipuite him zawkna tur leh lirthei chet vel awlsam zawk theihna tur te, vantlang kawngpui ti hnawk leh dipdal zawnga In sak, hnathawh leh thil tihte a awm lohna turin endikna hi neih a ni. Nimin-a endikna ah hian vantlang ram nek zawnga hmalakna awm theite leh lirthei leh ke-a kalte veivahna tibuai theite chu chhinchhiah niin, khawtlang nuam leh chenna nuam a awm theih nan a tul anga bawhzui zel a ni dawn a ni. Serchhip khawpuiin kawng nuam leh him tha kan neih theihna turin Road Protection Squad hrang hrangte chuan thla hnih (2) dan apiangin an Bial chhunga kawngte an endik thin dawn a,  An endikna report hi District Bawrhsap hnenah thehluh leh tur niin District Administration chuan a tul dan ang zelin hma a la dawn a ni.