Serchhip-ah Khet Bachao Abhiyan Campaign hmalakna thlirho a ni
Serchhip DC Meeting Hall-a thutkhawm neih ah hian District Agriculture Officer (DAO), K. Laltlanmawia chuan ‘Khet Bachao Abhiyan Campaign’ hi India ram pumah October ni 22, 2026 atanga November ni 30, 2026 chhunga kalpui tura Ministry of Agriculture & Farmers Welfare leh Indian Council of Agricultural Research (ICAR) tangkawp in a buatsaih a nih thu a sawi a. He Campaign hian a tum ber chu loneitu ten hlawk zawka buh leh thlai an tharchhuah theih nan te, ram leilung hau-sakna tichhe lo zawnga hmalak te, chemical fertilzers te dik taka hman dan inzirtir te, ruahtui leh tuihna humhalhna kawnga hmalakna te leh natural farming nasa zawka kalpui te a nih thu a sawi a ni.
He Campaign-ah hian loneituten sawrkar Scheme hrang hrang te an lo chhawr tangkai theih nana an harsatna leh mamawh in hrilhriatna te pawh neihpui thin a ni a. Serchhip District-a khua leh Village Council zawng zawng te tuam chhuak vek tura ruahman niin, tunah hian khaw 42 tuam turah khaw 26 tuam chhuah tawh a ni.
Nimin a thutkhawm ah hian District Bawrhsap, Paul L. Khuma chuan kan ram leilung humhalh chu kan mawhphurhna a ni tih sawiin, Line Department hrang hrangten thawhhona tha tak vawng nunga, theihtawp chhuah zel turin a fuih bawk a ni. He thutkhawm ah hian Addl. DC Dorothy Muansangi, DRDO Project Director Dr. Malsawmtluanga Fanchun bakah Agriculture Department, ATMA, KVK, RD Department, Fisheries, Horticulture leh Irrigation Department aiawhte leh khawtlang hruaitute an tel a ni.