MJA (SD) ten an zinna-a an thil hmuh te Serchhip DAO an sawipui

Mizoram Journalists’ Association (MJA) Serchhip District hruaitute chuan nimin khan Serchhip-a District Agriculture Officer (DAO), K. Laltlanmawia chu a Pisa-ah kawmin tunhnaia Khawzawl leh Chanmphai District-a Agriculture Department hmalakna an tlawh chungchang an sawipui.
DAO Pisa-a an inkawmna ah hian MJA Serchhip District hruaitute chuan Agriculture Department hmalakna hrang hrang tlawhna hun remchang Serchhip DAO in a ruahman sak chu lawmawm an tih thu sawiin, November 11, 2026-ah Tualpui khua tlawhin Nov. 12-ah Tualte leh Champhai Winery te an tlawh thu an sawi a, heng hmun hrang hranga Tung, Nihawi leh Tomato chinna hmun bakah Grape chingtute tharchhuah sawngbawlna-a an thil hmuh te an hrilh bawk.

Serchhip DAO, K. Laltlanmawia chuan Serchhip District-ah Tung dinhmun an zirchian mek thu sawiin, khaw 21 atanga report an dawn ah chhungkaw 363 ten Tung hi neiin Tung Kung 76,367 a awm mek thu leh Hectare 534-a Tung hi awm anga ngaih a nih thu a sawi a. Tunah hian hmalakna an kalpui mek thu sawiin, Nihawi chin kawngah pawh nasa taka hma an lak mek thu a sawi bawk a. Nakum-ah khaw hrang hranga Vaimim, Arhar Dal leh Nihawi-te chu Lo pakhat atanga thar thei tura ruahmanna an neih thu sawiin, an ruahmanna-te kalpui tura khaw hrang hranga loneitute an lo inbuatsaih theih nan leh, an ruahmanna neih dante inhrilhhriat hun hmangin khaw hrang hrangah inzirtirna an kalpui mek tih a sawi bawk a. Thuthar thehdarhtu ten an Department hmalakna an hmuha mipuite hriat theih tura an phochhuah theih nan a theih anga hmalak zel an tum thu a sawi bawk.