Chief Minister hovin Serchhip District-a sawrkar Department te hnathawh thlirho a ni
Serchhip District Bawrhsap, Paul L.Khuma kaihhruaia DC Pisapui Hall-a thutkhawmah hian Chief Minister Lalduhoma chuan he thutkhawm hi Mizorama hmasa ber ni turin, District Level-a Department hrang hrang hotuten hmaichhana Chief Minister hnena an harsatna an thlen theihna tura buatsaih a nih thu a sawi a, District dangah pawh tih chhoh zel tum a nih thu a sawi a. Vikshit Bharat 2047 rualin ‘Transformed Mizoram 2047’ chu Mizoram Sawrkar Vision a nih thu sawiin, tun dinhmuna Mizoram in GDP-a 0.1% a thawh ve chu kum 2047-ah chuan 1% GDP-a hlankai tum a ni, a ti.
Chief Minister chuan Mizoram chu Ginger Capital of India tih a nih tawh bakah Assam khûma Silk Capital nih tum a nih thu te, Winter Capital of India nih tum a nih bawk thu te leh Sangha, Kaikuang leh Chakai-ah te intodelh turin CM Blue Mission kalpui tum a ni thu te a sawi a, Digital lama hmahruaitu ‘Digital State’ nih tuma hmalak mek a ni bawk, a ti a, Department hrang hrangte inkarah thawhhona tha, Convergence ngaih pawimawh a nih thu sawiin, Department hmalakna leh hnathawh dan hrang hrangte chu thawhhona (Convergence)-a kalpui a nih deuh zel tawh thu te a sawi a, sawrkar kal dan pangngai ngawr ngawr ang ringawta kal a hun tawh loh thu sawiin, tunlai khawvel changkang tawh takah sawrkar department tinte chu thil thar ching chhuak zawng (innovative)-a kal chhoh thiam a pawimawh tawh thu a sawi a. Tunlai Artificial Inteligence (AI) khawvelah Mizoram State pawh a hnufum lutuk bik loh thu sawiin, thil siamchhuah leh Processing kawngah nasa taka hma kan sawn chhoh tawh thu leh 'CM Innovation Award ' hial buatsaih a nih thu a sawi bawk.
Sawrkar Department hrang hranga Officer leh thawktute chu mipuite ti beidawng zawng ni lovin, an mamawhna te a theih dan dana tihhlawhtlinsak dan kawng zawnpui thin turin Chief Minister chuan a chah a, ram hmasawnna hnathawh tur atana Sawrkar Department hrang hrangten Project an duan te chu khuarei daih (Sustainable) leh a hlâwkna hmuhlêt leh tur awm (revenue) ngei siam thin turin a chah a, Serchhip District chuan ‘Ramlai Malsawmna’ a dawn thu leh Mizoram hmundangte tan pawh a entawntlak ni tura tan la sauh sauh turin sawrkar Department hrang hrang a hotu (Head of Department) kalkhawm te chu a chah a, Serchhip District chu Model District ni turin duhsakna a hlan a ni.
He Meeting-ah hian Serchhip District chhunga Department hrang hrangten hmasawnna ruhrel leh Project hrang hrang - hna thawh mek te, harsatna te leh hmachhawp hrang hrangte chipchiar taka sawiin, thawhhona tha zawk siam leh harsatna sutkian dan turte sawiho a ni a, Serchhip District chhunga sawrkar Office hrang hrang 43 ten an hmalakna te an tarlang a ni.