Aizawl-a Assam Rifles ram hman tangkai dan tur thlirho leh a ni

Aizawl-a Assam Rifle ram chhuahsan hman zui dan tur reltu, pawl hrang hrang aiawh telna, Advisory Committee on AR Land chu nimin khan CM Conference Hall-ah Chief Minister Lalduhoma hova thukhawmin an hmalak mekna thlirletna an nei.
He thutkhawm a tel te hian Aizawl Square tur chu a kual chhuaka footpath siam nise, a tlang a san deuh avangin rawt hniam deuh ni se, thing kih ngai a awm a nih pawhin kitin a aia tam, thing mawi zawk, Mizoram thing ngei, mumal leh hmuh nuam zawk tura phun nise an ti a. Tuna kawngpui zauh belh mek (Aizawl Spine Road) hi meter 14 a zauh a ni a, chu chuan 1.5 Mtrs Footpath a keng tel a. Hei hi mipui lam atanga a zau tawk lo tia sawiselna a awm avangin tuna mi aia zaua zauh belh hlek tha an ti. A kawngko lungrem te chu khawpui timawi thei tur ngaihtuah chung zela kalpui tha an ti bawk.

Mandir sawnna hmun tur chungchangah Dak Inpui piah, Open Amphi Theatre sakna tura ruahman hmun thlen phei hma deuha hmunawl chu ruahman a ni a. Chhuahlam-a By-pass road laih mek Saron Veng-a a chhuah pheina tur Baptist Kohhran Biak In hmun thar atan Biak In awmna hnung, Modern School ram hnung, By-pass road thar leh Aizawl Square chhuahchhawng kawngpui thar tur inkar chu ruahman fel tawh a ni bawk a. By-pass road thar hnuai, Bethlehem Veng chunga Forest area chu thing leh mau tichhe lova, mipui lenvah theihna tura cheimawi dan tur UD&PA lamin an duang a. Hna thawhna tur sum pawh a awm dawn a. An ruahmanna hi Committee hian an pawmsak a ni. 

Assam Rifles ram hmalakna hi March 17 khan Early Bird Project hawn (launched) a lo ni tawh a, hmun hrang hrangah kut thlak mek niin nimin-a thutkhawm ah hian Minister thenkhat leh Official dangte pawh an tel a ni.