Thenzawl Vengthar VC by-Election atan Draft Roll tlangzarh
Thenzawl Vengthar Village Council Draft Roll hi nimin khan Serchhip Bawrhsap leh District Election Officer (DEO) Paul L. Khuma chuan Serchhip DC Meeting Hall-ah tlangzarhin inthlanna boruak muanawm leh hlawhtling tak a awm theih nan mawhphurtu zawng zawngte chu theihtawp chhuah turin a sawm a. Draft Roll a tlangzarh zawhah Political Party hrang hrang hruaitute - ZPM Thenzawl Block, INC West Block, MNF West Block, BJP District President te, Village Level Officer (VLO) Thenzawl leh ERO leh AERO te hnenah a copy a sem nghal a ni.
He hunah hian Dy. District Election Officer Dorothy Muansangi chuan By-election atana inbuatsaihna leh hmalak dan turte sawiin, by-election neih turah hian VC Seat pathum atan inthlanna neih a ni anga, heng zinga seat khat chu hmeichhe tana hauh (Reserved) a nih tur thu a sawi a. Tuna tlangzarh tak Draft Roll-ah hian voter mi 372 an awm mek thu a sawi bawk.
Electoral Registration Officer (ERO) Lalhlimpuia chuan Draft Roll hi January ni 8, 2025-a VC Inthlanpui behchhana siam a nih thu sawiin, VC hian Electoral Roll hran an neih thu leh MLA/MP Electoral Roll, SIR 2026 neih zawh tak nen hriat pawlh loh tur a nih thu a sawi a. VC Electoral Roll-ah chuan January ni 1, 2026-a kum 18 tling chin, India khua leh tui dik tak, January ni 1, 2026 atanga thla 6 hmalam (6 months before 1st January 2026)-a Thenzawl Vengthar-a lo awm tawh te chauh an tel theih thu leh Scheduled Tribe-te tan chauh a tel theih thu a sawi bawk. Electoral Roll-a hming thar thar, paih leh siamthat ngaite tan October 15, 2026 thleng dilna thehluh theih niin heng te hi enfiah a nih hnuah Final Electoral Roll chu Nov. 2, 2026-ah tlangzarh a ni ang.