Society atangin Sawhthing quintal 1,83,094 lei tawh
Mizoram Agricultural Marketing Board (MAMB)-in Akashvani News Aizawl a hrilh danin, Secondary Collection Center kaltlanga kumin-a Sawhthing lei zingah hian Champhai District-a Sawhthing lei a tam ber a, quintal 40,211 lei a ni a. Hei hi Saitual District chuan dawtin, quintal 29,144 lei a ni a, Serchhip District chu pathumna a ni a, quintal 25,026 lei a ni bawk. MAMB chhinchhiah danin, Mizoram District zingah Kolasib District chu Secondary Collection Center kaltlanga Sawhthing hralh tlem ber an ni a, chhinchhiah theih chinah kumin chhungin quintal 2,192 an hralh a ni.
Mizoram Agricultural Marketing Board chhinchhiah danin, kumin 2026-a Sawhthing chingtu Society hnuai a inziaklut loneitu hi mi 11,655 an awm a, Champhai District-ah tam berin mi 2446 an awm a, Serchhip District-in dawtin mi 1894 an awm a, Saitual District chu Sawhthing chingtu tam lamah pathumna niin mi 1803-in Sawhthing hi an ching a ni. MAMB chhinchhiah danin Khawzawl District-ah mi 1694, Aizawl District huamchhungah mi 1415, Lunglei District-ah mi 636, Mamit District-ah mi 602, Lawngtlai District-ah mi 403, Hnahthial District-ah mi 351, Kolasib District-ah mi 237 leh Siaha District-ah mi 174 te an awm a ni.