Serchhip Chanmari Branch YMA Golden Jubilee lawmna MLA, T. Lalhlimpuia hovin neih a ni
Serchhip Chanmari Branch YMA Golden Jubilee lawmna Zotawna Futsal Ground-a neih ah hian Khuallian Lunglei West Bialtu MLA T. Lalhlimpuia chuan he hun hmanpui tur hian a tirah Bialtu MLA leh Chief Minister, Lalduhoma chu beisei ni mah se Programme dang a neih avanga a telpui theih loh thu sawiin, Chief Minister aiawh hian Golden Jubilee chibai bukin duhsakna a hlan a. He hun ropui tak hmanpui tura ani an sawm chu lawmawm leh ropui a tih thu sawiin, amah ngei pawh Serchhip Chanmari Veng-a lo khawsa thin a nih thu leh an ngainat em em hmun a nih thu a sawi bawk.
Mizoram sawrkar hmalakna thenkhat te pawh MLA, T. Lalhlimpuia chuan sawiin, heng hmasawnna thleng mek te dawngsawng tura kan inbuatsaih a pawimawh thu bakah kan ram venhim chu a ram mipuite kutah a awm tih kan hriat a tul thu a sawi a. YMA in ram leh hnam himna tura hma a lakna te pawh a pawimawh thu sawiin, a bik takin kan rama Rel rawn lut avanga hnamdang lo lut leh sumdawnna kawnga inchimralna awm thei lakah kan fimkhur a tul thu a sawi a. Thil tha a rawn thlen laiin a tha lo zawngin nghawng a nei thei tih hriaa kan ILP te pawh kan hman tangkai a tul thu sawiin, kan ram damna turin theihtawp chhuaha hma kan lak a tul thu a sawi bawk a ni.
Serchhip Chanmari Branch YMA Golden Jubilee lawmna hi an Branch President, C. Vanlalthlana chuan kaihruaiin Khuallian hian Jubilee hriatrengna lungphun hawngin Chanmari VC President T. Lalengruala chuan Souvenir an buatsaih chu a tlangzarh a. Branch YMA Secretary, K. Lalduhsaka hnen atangin Branch YMA chanchin ngaihthlak a nih bakah hruaitu hlui te chawimawina hlan an ni bawk.
Tuna Chanmari Branch YMA ni ta hian September 21, 1975 khan khatihlai-a Bawngchawm YMA hnenah indan dilin hei hi an remtih sak lo a. Amaherawh chu Veng tana thil pawimawh leh tul nia hriain hemi kum vek hian ‘Tarpi Section’ tiin an din a, a kum leh April 16, 1976-ah ‘Tarpi Section’ chu dan anga din a ni ta a. Hei hi an dinchampha ah hmangin kum 1993 khan Branch YMA-ah hlankai an ni leh a, kumin April 16 khan kum 50 hi tlingin hemi ni hian a lawmna bul tanna hun hmangin nimin khan a kharna leh a lawmna pui ber hi an hmang ta a ni. Tun dinhmun ah Chanmari Branch YMA-ah hian Member Mipa 422, Hmeichhia 188 leh Life Member 14, an vaiin mi 624 an awm mek a ni.