Hulhliap-SSC Batch 9 tan cheng nuai 386 hman niin Camp chhuak 30% in ruihhlo an nghei zel rih bawk
Social Welfare & Tribal Affairs Department SPIO in RTI hmanga zawhna a channa atanga a lan danin Ruihhlo ngai ten nun thar an neih leh theihna atana buatsaih Hulhliap Short Stay Centre (SSC) Camping hi tum kua neih a ni tawh a, Batch khatna chu June ni 23, 2025 atanga July ni 12, 2025 khan neih a ni a, Camping tawpna ber (Batch kua na) chu March ni 23,2026 atanga tanin April ni 11, 2026 thleng khan neih leh a ni a. Chhinchhiah danin Camping-ah hian an vaiin mi 2255 an lut a, heng zinga 2184 chu mipa niin hmeichhia 71 an awm bawk a. Campers zinga hmeichhia aia mipa an tam zawkna hi 96.85% a tling a ni.
Camping buatsaih chhan zawhna chhangin SPIO chuan Hon'ble Minister, Social Welfare, Women & Child Development Lalrinpuii hovin Department hrang hrang leh tlawmngai pawl te chuan May ni 26, 2025 khan thutkhawmna an nei a, kan ram in a buaipui em em ruihhlo ngaite enkawlna kawng a hmalak ho dan tur te sawi a ni a. Chumi sawihona atang chuan Hulhliap-Short Stay Centre (a hming hi a hnuah phuah a ni) chu din tha tih a nì a, din chhoh a ni ta niin a sawi a. Hulhliap Short Stay Centre kalpuina atan hian Task Group pasarih- Task Group on Admission & Medical Services, Task Group on Mobilization & Security, Task Group on Fooding & Accommodation, Task Group on Sponsorship & Referral Services, Task Group on Public Relations, Task Group on Counselling, Research & Documentation leh Task Group on Aftercare, Skill Training & Handholding te siam a ni tih a sawi a ni.
Task Group hrang hrangte sum hmanral zat zawhna chhangin Task Group on Admission & Medical Services in Rs. 64,38, 321/-; Task Group on Mobilization & Security-in Rs. 32,83,900/-, Task Group on Fooding & Accommodation-in Rs. 67,84,598/-; Task Group on Sponsorship & Referral Services-in Rs. 83,56,980/-; Task Group on Public Relations-in Rs. 20,83,130/-; Task Group on Counselling, Research & Documentation-in Rs. 10,59,400/- leh Task Group on Aftercare, Skill Training & Handholding-in Rs. 31,60,070/- te a ni a. Heng bakah hian Hulhliap- Short Stay Centre a thawktu te zawng zawng Honorarium te, International Day Against Drug Abuse & Illicit Trafficking ni hmanna te, Mizoram Synod hnena a hmun hman man bakah Narcotic Anonymous Awareness Programme leh Administrative cost atan te a sum hi hman a ni a, a vaiin hemi kaihhnawih atan hian cheng nuai 386.63 hman a ni tih zawhna chhanna ah hian a tarlang bawk.
Hulhliap Short Stay Centre atanga Pathian chhandamna chang zat zawhna chhangin Centre-a lut zawng zawng mi 2255 zingah a tawp thlenga awm chu mi 1430 te chuan Pathian hnena inhlanin Centre an chhuahsan tih a sawi a. Centre atanga chhuakte enkawl zui dan zawhna chhangin, Hulhliap-SCC atanga chhuakte hi thla thum (3) chhung follow-up neihpui an ni a, Treatment Centre-a awm duhte chu an awm man leh mamawhte pek sak an ni a. Damna kawng an zawh chhoh zel theihna turin Narcotic Anonymous (N.A.) Meeting chu Synod, Sawrkar leh MDUF te nena tangkawpa buatsaih chhoh mek a ni a, hmun 28-a nei tura ruahman niin Hulhliap SCC atanga chhuakte hi thla thum (3) chhung bawhzui an ni a, hemi hun chhung hian 30% chuan ruihhlo an nghei zel hrih tih SPIO chuan a sawi bawk.