Serchhip Bawrhsap in kawng siam hna thawktute a kawm

Serchhip District Bawrhsap, Paul L. Khuma chuan nimin khan KRAM Infracon Pvt. Ltd. a thawktute chu a Pisa-ah kawmin Serchhip District-a National Highway-02 kawng khuar hnawh hna (patchwork repair) thawh mek chungchang leh an hmalakna te a sawipui.
He hunah hian Serchhip Bawrhsap chuan  kawng chu tha tak leh uluk taka siam a nih chuan mipuite tan a daih rei mai bakah, a hna thawktute tan pawh tha leh zung sen belh zel tur a tlem tur thu sawiin, chutiang tur chuan uluk taka hna thawk turin he kawng enkawl hna thawk mektu KRAM Infracon Pvt. Ltd hnuaia thawktute chu a ngen a. He hunah hian kawng hna thawh mek dinhmun te leh hna thawhna kawnga harsatna awmte sawiho a ni a, tun aia chak zawk leh tha zawka kawng siam hna hi thawh a nih theih nan ruahmannate an siam nghal bawk a ni.

Tarlan tawh thin angin Serchhip District paltlangtu National Highway-02 siamthat hna (Permanent Repairment) chu kalpui chhoh mek a ni a, tunlai hian Serchhip District hmar lam, Baktawng khua atangin he kawng siamthat hna hi thawh mek niin chhun leh zan lamah te hna hi thawh a ni.