RIPANS College of Nursing-a zirlai ten thutiam an la

Regional Institute of Paramedical and Nursing Sciences (RIPANS)-a College of Nursing chuan nimin khan 26th Lamp Lighting and Oath Taking Ceremony an hmang a, he hun hi Minister Lalthansanga chuan a hmanpui a ni.
RIPANS Auditorium, Zemabawk-a he hun hman ah hian RIPANS Director Dr. Sanjay D. Sawant chuan inlawmna thu sawiin, Principal Prof. Lalfamkimi chuan College of Nursing Report tawi pe in Apollo School of Nursing-a Principal Lalhmingmawii chuan ‘Florence Nightingale Pledge’ Bati Chhi a Nurse zirchhuak te thutiam laktirna chu a kaihhruai thung a. Thutiam latute hi B.Sc Nursing zirlai 55 an ni a, heng zirlai 55 te hi North East India States 7 leh Sikkim bakah Prime Minister Special Quota hnuaiah Jammu& Kashmir atanga lo zir te an ni.

He Programme-ah vek hian College of Nursing, RIPANS chuan a vawikhat nan ‘Best Preceptor Award’ hlanin Best Preceptor Award hi RIPANS-a Nursing zirlaite an Clinical duty-na thin Hospital pali- Civil Hospital, Kulikawn Hospital, Mizoram State Cancer Institute leh Zoram Medical College & Hospital, Falkawn atangin zirlai ten an duty-na a ‘Nurse’ kaihruaina leh zirtirna lo pe tha ber tu-a an ngaih an thlanchhuah te hnenah khuallian hian a hlan a ni.

RIPANS College of Nursing hi Mizoram a Nursing College hmasa ber niin kum 1996 khan din a ni a. Tun dinhmunah BSc.Nursing Batch 27 atangin Graduates 879 awm tawhin, M.Sc Nursing Batch 3 atangin mi 65 in an zirchhuak tawh bawk a, India ram leh ram pawn hmun hrang hrangah an thawk mek a ni. Nakum Session atangin Ph.D in Nursing hawn tum a hmalak mek a ni bawk. He hunah hian Institution leh Hospital hmun hrang hrang atanga sawmbik te leh thutiam latu zirlai nu leh pa te an tel bawk a ni.