Oil Depot chungchangah Hindustan Petroleum Corporation Ltd. hotute kawm
He inkawmna ah hian Supply Minister B. Lalchhanzova chuan HPCL-in Mizoram-ah Oil Depot an neih ngei theih nan tha thlah lovin an um zel tih sawiin, “Kan hmalakna ten rahtha a chhuah ngei theih nan kan theihna zawng zawngin kan bei zel dawn a, HPCL bakah IOCL lam te nena Oil Depot siam tura indawrna a la kal ve zel a, Chief Minister remtihna angin Oil Depot siamna tur hmunhma pawh Oil Company te hnenah man awm lo a pek mai theih beisei a ni,” a ti.
Supply Minister chuan Mizoram chu tlang leh suarin a bawm vel, ram tlawhpawh awlailo a nih avangin India ram State dangte hmasawn rualin hma kan sawn chak lo bik hle a, Oil company te pawhin hlawk tumna atang ringawta thil thlir lovin, Mizoram mamawh tihsak chu an Company tan pawh Van malsawmna dawn belhna tur a ni ngei dawn niin a sawi a. Mizoram chhim lama sumdawnna kawng inhawng mek en chungin chhim lamah pawh Oil Depot hi hawn belh zel dan thlithlai turin HPCL te hi a chah a, India ram himna tur en tel chunga a rang thei ang bera Mizoram in Oil Depot a neih chu ram hmangaihna avang pawhin tihmakmawh a nih thu a sawi bawk.
He inkawmna an neih hnu hian Supply Minister hian Betkuchi hmuna HPCL Oil Depot chu a tlawh bawk a. Mizoram-a Oil Depot bun a nih theih nan hian HPCL Kolkata Oil Terminal chu Supply Minister hian July ni 12, 2024 khan a lo tlawh tawh a. Inbiakna pawh thui tak kalpui tawh niin North East Zone hawn a nih takah hian Guwahati-a an hmunpui lamah Oil Depot chungchang hi Minister hian a bawhzui zel a ni.