MZP dinchampha lawmna leh Zirlaite Ni 2026 lawmna Education Minister hovin neih a ni

Mizo Zirlai Pawl (MZP) dinchampha vawi 90-na chu nimin khan Multipurpose Hall Berawtlang-ah lawm a ni a, he hun hi School Education Minister Dr. Vanlalthlana chuan hmanpuiin MZP dinchampha hi ‘Zirlaite Ni’ atan sawrkar in a pawmpui angin kum 2006 atang khan hman thin a ni. MZP dinchampha puala Zirlaite Ni hmanna Multipurpose Hall, Berawtlang-a neih ah hian School Education Minister Dr. Vanlalthlana chuan Mizoram a Zofate tan MZP in a thawhhlawk zia leh Mizoram in remna leh muanna kan neih theih nan a theihtawp chhuaha hma la tu an nih thu sawiin, kan inhung bikna ILP chungchangah te, Ramri humhalh kawngah te nasa taka Jail tan leh mahni nunna pawh chan hial huam a hmala thintu pawl ropui tak a nih thu a sawi a, MZP hruaitu tam zawk chu Politics a lut lo an nih thu leh mi tam takin ‘Politics kailawn’ a an sawi chu a dik lo tih sawiin, “He pawl lo hruai tawhtute zawng zawng hi zah an phu hle a ni,” a ti a. “He khawvel kan awm mekna hi Digitalized vek a ni tawh a, kum naupang te te pawhin ‘AI ka bia’ an ti a, an duh duh danin an hmang thei tawh a, Vawiin-a zirlaite hian heng technology thil hrang hrangte hi kan hman tangkai thiam a tul hle a ni,” a ti bawk.

He hunah hian MZP General Hqrs. President Dr. C. Lalremruata pawhin MZP chu kum 1935-a din a nih atangin zirlaite, ram leh hnam tana ke penna kawngah harsatna hrang hrang tawkin hruaitu hmasate zarah a kal hram hram tih a sawi a, “He pawl hian kawng hrang hrangah ke pen in Zofate kan inpumkhat theih nan te, MPSC hnuaia hnalak chungchangah te, kan inhung bikna ILP chungchangah te, Education Department enkawl biktu tur Mizoram Education Services (MES) kan neih theih nan leh thlaite hna zawnna kawnga puitu tur Mizoram Youth Commission (MYC) kan neih theih nan nasa takin hma a la a, kawng hrang hrangah a hlawhtlinna kan hmu chho ve zel a, a lawmawm hle a ni,” a ti a. Heng bakah hian, Hnamdangin kan zirna In hrang hranga kan quata neih min chuhpuina kawngah theihtawp chhuaha hmalak a lo ni tawh thu te a sawi bawk.

MZP kum 90 tlin lawmna hi nikum atanga neih niin nimin khan a hmawr bawk a ni a, MZP hian Programme pawimawh tak tak Mizo zirlai titha chawimawi te, Zofest, Zirlaite Ni, Zoram Ni, Inter High School Quiz Competition, Hnamdang nupui/pasal nei lo tura inzirtirna te leh Remna Ni te an hmang thin a ni.