Mizoram-a zu endik turin tum hnih tawn a ni tawh; Zu chhe in vangin Mizoram-ah mi 56 an thi tawh
.png)
Excise & Narcotics Department SPIO in RTI hmanga zawhna a chhanna atanga a lan danin Rangvamual/Phunchawng Zu hi phai lam Laboratory-ah endik turin tum thum thawn a ni tawh a. Zu endik tura thawn hmasak ber chu ni 2.3.2023 khan RIPANS-ah thawn a ni a, anni hian ARBRO, New Delhi-ah an thawn chhawng ve leh a. Hei bakah hian ni 27.2.2025-ah ARBRO leh ni 22.1.2026 khan ARBRO-ah tho hian thawn a ni tih a sawi a ni. Mizoram Zu te endik tura thawn nge anih chhan zawhna chhangin, ‘Mizoram-a Zu dinhmun hriatchian duhna avangin endik tura thawn a ni,’ a ti a. Mizoram zu endikna atangin thil hlauhawm leh tha lo hmuhchhuah a awm leh awm loh zawhna chu, ‘Result te hi Mizoram-a mithiamte entir/hmuntir an la nih loh avangin a hlauhawm dan hriat a ni lo,’ tiin a chhang a. SPIO chuan Mizoram-ah Fruit Beer siam phalna licence mi 11 hnenah leh Winery Licence mi 2 hnenah pek a ni tawh tih a tarlang bawk.
Excise & Narcotics Department website tarlan danin kum 1997 atanga kumin thlengin Mizoram-ah Zu chhia in vangin mi 56 an boral tawh a, Zu chhia in vanga boral an tam ber kum chu kum 2001 kha niin hemi kum hian zu chhia in vangin mi 14 an boral a. Chhinchhiahna atanga a lan danin kum li chhung, kum 2023 atanga 2026 chhungin zu chhia in vanga thi chhinchhiah Mizoram-ah an awm tawh lo a ni.
Hetihlai hian April 2014 atanga June ni 12, 2026 thleng khan Mizoram-ah zu vangin mi 325 an thi tawh a, thi zinga 279 hi mipa niin hmeichhia 46 an awm bawk a. Chhinchhiahna atanga a lan danin kum 2019, 2020, 2021 leh kum 2022-ah te zu vanga thi chhinchhiah an awm lo a, a bak zawngah chuan chhinchhiah chinah zu vanga thi kumtin an la awm a ni. Kum 2014 atanga 2026 inkar chhung hian nikum 2025 khan zu vanga thi an tam ber a, mi 94 an thi nia chhinchhiah a ni a, kum 2024-ah 66, 2023-ah 56 leh 2017-ah 52 te chhinchhiah an ni bawk.
Kumin January atanga June ni 12 thleng khan zu vanga thi hi mi 18 chhinchhiah a ni a, heng zinga 16 hi mipa niin hmeichhia 2 an awm bawk. Zu vanga thi hi Kolasib District-ah tam berin mi 142 thi a, Champhai District-in dawtin mi 70 an thi nia chhinchhiah a ni a, a pathumna chu Serchhip District niin mi 57 an thi a, Aizawl District-ah mi 33 chhinchhiah a ni bawk. Zu vang hian Lawngtlai District-ah mi 2 leh Siaha District-ah mi 1 an thi a, Hnahthial leh Saitual District-ah chuan zu vanga thi chhinchhiah an awm lo thung a ni.