KVK Serchhip District-ah Khet Bachao Abhiyan hawng
Sawrkar laipui-a Ministry of Agriculture & Farmers’ Welfare hmalakna a kalpui ‘Khet Bachao Abhiyan’ hawnna hun KVK Conference Hall, N. Vanlai-phai-a neih hi KVK Serchhip District-a Sr. Scientist & Head, Dr. T. Vanlalngurzauva chuan kaihruaiin he huna tel te lawmna thu sawiin, he hun an hman chhan tlangpui a sawifiah a. Kan leilung luah lai mek hi chhuan lo la awm zel turte tan kan hman lawk mai anih thu leh ram leilung leh lui te tichhe lo thei ang bera kan enkawl a tul thu a sawi a. Subject Matter Specialist (Soil Science) Mary Lalfakzuali chuan Khet Bachao Abhiyan thil tum leh tihhlawhtlin dan tur te, loneituten an tih theih hrang hrang te a sawifiah ve bawk a ni.
He hun hi North Vanlaiphai VC-I a VC President F. Lalremruata chuan khuallian niin a hmanpui a, KVK ten hetiang hun an hmang chu lawmawm a tih thu sawiin, an hman chhan leh a pawimawhna te a sawi a. N. Vanlaiphai chu Leilet zau tak nei khua an nih thu sawiin, an leilet leh huan/lo ram enkawl kawnga mithiamte thusawi ngaih pawimawh a tul thu leh tharchhuah teuh an tum luat avanga leitha leh rannund thahna hlo te, hnim/di hlo kan hman nasat sawt zia leh chu chuan hmalam huna harsatna a awm theih avanga fimkhur an mamawh deuh deuh thu te a sawi bawk.
Khet Bachao Abhiyan (Save the Farm Campaign) hi kan leilung hriselna vawnhim a tul zia te, Chemical Fertilizer leh rannung/hlo thahna hman tlem chungchang leh kan ram leilung leh tui te tichhe lo zawnga hmasawnna chhenfakawm thlen a pawimawh zia inzirtirna leh khuarel zulzui thei ang bera lo/huan neih chungchanga inzirtirna atan hman tur niin Khet Bachao Abhiyan kalpui zelna tura lirthei kal tur chu vailiam a nih bakah KVK hian loneitute hnenah thlai chi an sem nghal a ni.