KPP Intawhkhawmna neih tur atan inbuatsaih mekin tun thla ni 13 zan-ah Pandal hlanna neih tum a ni

October 16-18, 2026 chhunga Serchhip khua in Rampum huap Kohhran Pavalai Pawl (KPP) Intawhkhawm a thlen tur atan inbuatsaihna kalpui mek zel a ni a, tunah hian Pandal pawh peihfel ni dawn hnaiin tun thla ni 13 zan khian Pandal hlanna Inkhawm neih tum a ni.
Rampum Huap Kohhran Pavalai Pawl Intawhkhawmna Serchhip khua in a thlen tur chungchang ah hian nimin zing khan Organising Committee chuan Serchhip-a thuthar thehdarhtute kawmin an inbuatsaihna hrang hrangah an tarlang a. Serchhip Bethel Kohhran Committee Room-a inkawmna ah hian Organising Committee Chairman, Upa Vanlalchhunga chuan tun tuma Intawhkhawmna neih tur hi a vawi 7-na a nih thu leh Aizawl pawn lamah tum hnih neih a nihna tur leh Pandal-a tum hnih neihna tur a nih thu a sawi a. He Intawhkhawmna neih tur atan hian July 23, 2024 khan Organising Committee dinin Office Bearers mi 13, Committee Member mi 29 leh Patron mi pahnih awmin Sub-Committee paruk (6) siam a ni tih a sawi a. Budget atan Rs. 50,10,000/- ruahman niin a thlengtu, Serchhip-a Presbyterian Pastor Bial pathum ten Rs. 6,70,000/- theuh an thawh bakah Synod Revival atangin cheng nuai 30 an dawn thu sawiin, sawrkar-ah sum leh pai inhlawhna/Contract dil lovin an kal thu a sawi bawk.


Amaherawh chu sum leh pai-a sawrkar hnik buai lo mah se he Intawhkhawmna kan dawn tur atan hian sawrkar tel lo chuan hmalak theih a ni lo tih Organising Committee Chairman chuan sawiin, Bialtu MLA leh Chief Minister bakah District Bawrhsap te kaihhruaina hnuaiah sawrkar Department hrang hrangte nen hma an lak thu a sawi a, sawrkar pawhin sum engemaw zat ruahmanin kawng hrang hranga hmalakna kalpui a nih dan te a tarlang a, mipui mamawh ei leh in leh eirawngbawlna Gas lamah pawh harsatna awm lo tura hma an lak thu a sawi bawk a ni.

He intawhkhawmna neih tur atana Pandal an ruahman dan pawh Organising Committee Chairman chuan sawiin, August 25, 2026 atangin Leisekawt Mual-ah Pandal sak hna hi tanin Mark Event & Entertainment, Ramhlun Aizawl chuan ‘German Hanger’ hmangin Pandal hi an sak thu a sawi a, a dung ft. 200 leh a vang ft. 190-a zau in tunkar Ningani, October 8, 2026 khian zofel tura hmalak mek a ni tih a sawi a. Pandal-ah hian ft. 12-a sei thutthleng 880 leh ft. 9-a sei 10 siamin mi sing khat tal thu thei tura an beisei thu a sawi a. Lam tual pawh ft. 102 x 40-a zau-a siam a nih thu leh Stage hi ft. 60 x 20-a zau-a dawh a nih thu a sawi a, Intawhkhawmna Programme zawng zawng hi SYNFO lawmin Live Coverage an tih dawn thu leh Sound lamah WAVE hman tum a nih thu a sawi a, October 13, 2026 (Thawhlehni) zan khian Pandal hlanna Inkhawm hi nei tura inbuatsaih mek a nih thu sawiin, Kohhran hrang hrang mi te pawhin he hunah hian chanvo an neih dawn thu a sawi bawk.

Nimin zing-a inkawmna ah hian KPP Intawhkhawmna neih tur atana thil pawimawh hrang hrang sawiho niin a bik takin chawhmeh (thlai) zuartu leh lirthei-a sumdawng ten sum lakluhna remchang ah hmanga ni dang-a an rate aia sang-a sum lakluh an tum lohna tura hmalak chu tul an tih thu leh hemi kawnga hmalak dan turte pawh sawiho a ni a, Faina kawngah nasa taka hmalak tum niin hemi pual hian ‘VC Area Fai’ inelna kalpui a nih thu te pawh tarlan a ni bawk a, a bik takin kawngpui kam-a In sakna bungrua senghawi ngai te chungchang pawh sawilan a ni bawk.

Organising Committee chuan he Intawh-khawmna neih tur atan hian hnatlang tum 10 vel neih a nih tawh thu sawiin, Bial leh Kohhran hrang hrang atangin tanpuina Rs. 1,80,000/- an dawn tawh thu an sawi a. He Intawhkhawmna neih tur denchhena kan khawtlang-a hmasawnna tam tak lo thleng chu lawmawm an tih thu an sawi rualin, heng te hi kan khawtlang tan vek a nih tih kan hriat a tul thu an sawi bawk.