Hnahsin Kut-in social Media-ah 22.5 million en a hlawh

Champhai-a hman ‘Hnahsin Kut’ chuan Social Media-ah en a hlawhin 22.5 million zetin an en a ni. Zirtawpni zan khan ‘Hnahsin Kut 2026’ kharna chu Champhai-a Mualnuam-ah neih niin he hun hmanpuitu Tourism Minister Lalnghinglova Hmar chuan, Hnahsin Kut hian Social Media-ah 22.5 million zet en a hlawh thu sawiin, “Hei hian a lar zia leh hlut a nih zia a lantir,” a ti a. Hnahsin Kut hian Champhai leh a chhehvel tan sum leh pai vir vel (economy) leh kawng hrang hrangah hlawkna a thlen thu sawiin, he Festival ngaihtuah chhuaktu leh bul tantu, Champhai Nature Conservancy (CNC) te thawhrimna leh remhriatna avangin lawmthu a sawi a. Mizoram aia mawi ram dang a awm bik lo tih pawh sawiin, State pawn atanga lo kal khualzinte pawh an thian leh chhungte nen Mizorama lo zin leh ngei tura sawmin, Mizoram mawina te, ram ralmuang a nihna leh mipuiten khualzin an lawmthiamna te midangte hnena hrilh darh zel turin a chah tel bawk.