Fur ruahtui tla vangin Oil Palm chingtu ten cheng nuai 100 chuang an hloh

Oil Palm chingtu ten kumin-ah Fur ruahtui tlak laia Oil Palm rah thiarchhuahna ah harsatna an tawh avangin cheng nuai 100 chuang an hloh anga chhut a ni a, hetihlai hian sawrkar in Oil Palm ah hma a lakpui zel avangin Oil Palm farmer ten an Oil Palm hmun an zauh belh bakah Oil Palm ching thar an pung zel.
Thudawn danin, Godrej Agrovet Ltd. hnuaia Oil Palm chinna hmun Mamit leh Kolasib District-ah chuan Fur zualpui lai May atanga August thla chhung khan farmer thenkhat ten an Oil Palm thiarchhuahna ah harsatna an tawk nasa hle a, hetihlai hian farmer te chuan an remchan angin Mau Pùm leh Lawng hmang te in an thiarchhuak a, hetianga harsatna an tawh avang hian Fur chhung hian an tharchhuah zawng zawng pawh an hralh thei lo a, chuvangin cheng nuai 100 chuang an hloh nia ngaih a ni. Kumin April atanga September thleng khan Farmer te Oil Palm rah tharchhuah chu Godrej Agrovet in quintal 41,380 an leisak tawh a, Oil Palm hralhna sum cheng nuai 683 chu Farmer te kutah an pechhuak tawh a. Tun sawrkar kum kal mek 2026-27 chhung hian Godrej Agrovet Limited te hian Kolasib leh Mamit District-a farmer te atang hian cheng nuai 1350 man vel Oil Palm rah leisak hman an in beisei a ni.

Oil Palm hi sawrkarin nasa taka buaipui tharin a hralhna man pawh a let 4 laiin hun hmasa lam aiin a to chho tawh a, a hralkhna ah farmer ten harsatna an tawh ngai loh avangin tunhnaiah farmer tam takin Oil Palm chin an intihhmuh chho mek nia thudawn a ni a. Oil Palm Area hi 838 hectares in a pun belh nia thudawn a ni bawk.