SHC Chairman in an party chhuahsanin SHC Budget Session neih tur thulh a ni bawk
Sinlung Hills Council (SHC)-a Chairman, R. Lalfakzuala chuan tun thla ni 16 khan MNF Legislature Party atanga banna chu Deputy Chairman, Benjamin Lalrawnliana hnenah a thehlut a, hemi hnu hian ZPM Party zawmin a Bial mipuite leh Sinlung Hills Area in hmasawnna tak tak a hmuh theih zawkna tura rorel lai party zawm anih thu a sawi a ni. SHC Chairman atanga bang ta R. Lalfakzuala hi 10-Tinghmun Constituency-a MNF Party ticket a thlantlin a ni.
Hetianga SHC Chairman in banna a thehluh hnu hian SHC Deputy Chairman Benjamin Lalrawnliana chuan R. Lalfakzuala chu ‘The Members of Sinlung Hills Council (Disqualification on ground of defection) Rules, 2022’ angin ni 7 (sarih) chhunga insawifiah tura hriattirna a pe a, he lehkha ah hian R. Lalfakzuala hian Mizo National Front (MNF) Party atanga a banna leh Zoram Peoples Movement (ZPM) Party a luh thu leh ZPM Party-a Membership Fee a pe lai thlalak pawh hmuh theih a nih thu leh hengte avang hian SHC Dan hmanlai, ‘The Members of Sinlung Hills Council (Disqualification on Ground of Defection) Rules, 2022’ Rule 3 (1) (a) chu a bawhchhe ngei nia alan thu a tarlang a ni.
SHC Chairman in banna a thehluh avang hian Vawiin, September 25, 2026 atangas SHC Budget Session neih tura ruahman tawh chu thulh a nih thu nimin khan SHC Deputy Chairman chuan thuchhuah siamin a tarlang a. He lehkha ah hian SHC Chairman hmasa chuan Council Budget Session vawi 5-na chu September 5, 2026 (Zirtawpni) a neih tura Notification a lo chhuah tawh chu thulh anih thu leh Chairman hmasa in a nihna a bansan tak avang leh Sinlung Hills Council (Procedure & Conduct of Business) Rules, 2021 Rule 5 & Rule 31 (2)-in thuneihna a pek hmangin Chief Executive Member (CEM) rawn chungin Vawiin atanga thutkhawm nei tura ruahman chu pumpelh theih loh harsatna (unavoidable circumstances) a awm avangin thulh (adjourn) a nih thu a tarlang a. General Council thutkhawm lehpek tur chu Sinlung Hills Council Act, 2018 leh Sinlung Hills Council (Procedure and Conduct of Business) Rules, 2021 te'n a sawi angin a hranin koh a la nih tur thu an tarlang bawk.