Serchhip District-ah Meth tam tham tak man a ni
Serchhip Police te hnen atanga thudawn danin tunkar Thawhlehni tlai lamah khan Agency dang te atangin Serchhip District-a East Lungdar Bial chhungah ruihhlo, Methamphetamine phurhluh a nih rinhlelh thu dawn a ni a, hemi bawhzui hian niminpiah khan Serchhip Sub-Divisional Police Officer (SDPO) Lalrinzuali leh NCB-a Intelligence Officer Dulal Paul te kaihhruai Joint Operations Team te chuan hma an la zui nghal a, he Team-ah hian Narcotics Control Bureau (NCB), Field Office Aizawl (Under Agartala Zonal Unit), DSB Serchhip DEF leh CID (SB) te an tel a, nizan hmasa dar 11:30 vel khan Keitum leh Khaw-lailung inkar, Tuichang Lei (bridge) atanga Khaw-lailung lam km 5 vela hlaah ruihhlo leh a neitu nia rinhlelh hi an man ta a ni.
Thudawn danin heng ruihhlo te hi Bike hmanga rawn phurh niin Bike khalhtu Lalpanliana (29) Falam, Myanmar nia insawi pawh man nghal a ni a, heng ruihhlo an man te hi Brick packet 15 niin, Tablet 1,50,000 zet a awm a; NCB chhut danin a hralh sum hlut zawng (market value) hi cheng vbc. 11.408 zet a tling a. Heng ruihhlo te hi Myanmar atangin Zokhawthar kaltlanga rawn lak nia hriat a ni a, Narcotics Control Bureau (NCB) te hian hma an la zui nghal a ni.