SELCO Foundation ten Electronic Vaccine Carrier 30 an hlan
Health Minister Office-a hemi puala hun hman ah hian Health Minister Lalrinpuii chuan SELCO Foundation-te hian Health Centre 530 laiah Solar Energy an dah sak tawh tih sawiin, Aizawl-ah 10 MT walk-in Cooler an siam sak tawh bakah tun tumah Electronic Vaccine Carrier 30 lai District pathum-te hman tur an pe leh ta chu lawmawm a tih thu a sawi a. Heng EVC-te hi Health & Wellness leh Sub-Centre-te awm lohna hmuna nu leh naupangte tan hri laka himna leh hriselna thlentu a nih ngei a beisei thu a sawi bawk.
Health Minister chuan Mizoram chu tlangram a nih avangin hmun kilkhawr leh tlawhpawh harsa tak takte a awm thin tih sawiin, heng EVC-te hian darkar 35 chhung 2°C leh 8°C inkarah vaccine-te a vawn that theih avangin hmun kilkhawr zawka awmte tan a hun taka vaccine an lak theih nan a tangkai hle dawn tih a sawi a. Health Department hmalakna thenkhat pawh tarlangin, HPV Vaccine Immunization chu State pumah 100.4% lai an ti hlawhtling tawh tih a sawi a. Health Department hotute chu theihtawp chhuah a, tanla zel turin a fuih bawk a ni.
SELCO foundation-in nimin-a Mizoram sawrkar an hlan tak Electronic Vaccine Carrier (EVC) hi ken kual awlsam leh zangkhai, Solar hmang niin, pakhat hi Rs. 1,50,000 man a ni a. He hun hi Health & Family Welfare Department Commissioner & Secretary Lalzarmawii chuan kaihruaiin Department hotute, State Immunization Team leh SELCO Foundation aiawhte bakah mi pawimawh dangte an tel a ni.