LMC area chhunga project hrang hrangte UD&PA Department-in LMC hnenah an hlan

Lunglei Municipal Council (LMC) area chhunga project hrang hrangte chu nimin khan Urban Development & Poverty Alleviation (UD&PA) Department chuan Lunglei Municipal Council (LMC) hnenah an hlanchhawng.

Hemi puala Aizawl Sumtual, MINECO-a hun hman ah UD&PA Department changtu Minister K. Sapdanga chuan UD&PA Department-in Lunglei Municipal Council (LMC) kuta project hrang hrang a hlanchhawng chu lawmawm a tih thu a sawi a. Budget leh funding lamah harsatna a awm thin chung pawha LMC ten tlo leh tha taka hna an la thawk thei chu lawmawm a tih thu a sawi a, hmasawnna hnathawhte tluang taka a kal zui zel theih nan Department leh LMC te inkarah thawhhona tha awm zel se a duh thu sawiin, duhsakna a hlan nghal bawk a ni.

He hunah hian UD&PA Director Jacob Lalawmpuia chuan project inhlan chhawna hriat tur leh zawm turte a sawi zau a. Project hrang hrangte LMC hnuaiah hlan a nih tawh avangin enkawlna leh hmalakna hna te LMC kutah a awm zui tawh dawn thu a sawi a. Hmasawnna hnathawhte hlawhtling taka kalpui a nih theih nan inhriatthiam tawnna leh thawhhona tha neih a pawimawh thu a sawi bawk.

UD&PA Department in LMC area chhunga hmasawnna ruhrel leh project pawimawh hrang hrang an hlan tak te hi Solid Waste Management Centre (I leh II), LMC Complex (Sazaikawn), Transport Hub (Hrangchalkawn), Multi-Level Car Parking (Thuamluaia Mual), Lungei Park Renovation, Composite Urban Infrastructure leh Storm Drain sakna te a ni a. Hemi puala hun hman ah hian UD&PA Department atangin Commissioner & Secretary V. Lalsangliana, leh Director Jacob Lalawmpuia bakah thawktu dangte an tel a. LMC atangin Chairman Lalzuithanga, Vice Chairman K. Lalrinawma, Secretary Lalremruata bakah official dangte an tel bawk; project zawh tawhte enkawl zui dan tur leh hmalakna hrang hrang an sawiho nghal bawk.