School fai inelna ‘Mizoram Green Schools League’ kalpui a ni dawn
UD&PA Auditorium-a hemi puala hun hman ah hian UD&PA Minister K. Sapdanga chuan UD&PA Department leh School Education Department tangkawpa buatsaih,‘Mizoram Green Schools League’ kalpui tan tura tlangzarh a ni chu lawmawm a tih thu a sawi a. School naupangten faina leh thianghlimna an ngainat a, an puitlin thleng pawha an ni tin nunphunga fai duhna an nunpui tlat theihna tur inzirtirna tha tak a nih thu a sawi a. He inelna hian lawmman sumfai engemaw zat a kengtel chu thil lawmawm tak a nih rualin, lawmman dik tak zawk erawh chu School hrang hranga zirlaiten fai duhna thinlung an pu tur chu a nih zawk thu a sawi a ni.
UD&PA Minister chuan hmasawnna leh changkanna tehfung pawimawh berte zing ami chu faina leh thianghlimna a nih thu pawh sawiin, School zirlai naupangte ah fai duhna thinglung tuh nghet a, an School, an chhungkua leh khawtlang vawnfaina kawnga hmahruaitu ni thei tura chher chu ‘Mizoram Green Schools League’ in a tum a nih thu a sawi a. “Kan ram hi kan tu leh fate, chhuanthar lo la awm zel turte tan a luah tlak, fai leh thianghlim taka enkawl hi mi tin mawhphurna lian tak a ni,” tiin, he mawhphurhna hlenchhuak tur hian naupang atanga puitling thlengin chanzo pawimawh tak kan neih thu a sawi bawk.
Mizoram Green Schools League hi Block Level, District Level leh State Level-a kalpui tur a ni a. State Level-a lawmman pakhatna hian Rs. 1,00,000, pahnihna in Rs. 70,000 leh pathumna in Rs. 50,000 a kengtel a. District Level-a pakhatna hian Rs. 10,000, pahnihna in Rs. 7,000 leh pathumna in Rs. 5,000 a kengtel bawk.
Block Level-a School titha 5 thlanchhuahte chu District Level-ah endik leh an ni anga. District Level-ah hian a thazual 3 thlanchhuah an ni leh dawn a. State Level-a inel turin District tin atangin a titha ber an tel dawn a ni. Ruahman dan chuan, School fai inelna endik hi October ni 12 atanga kalpui tan tur niin December ni 18 thleng awh tura tih a ni a. He hmalaknain a tumte chu School zirlaite hnenah bawlhhlawh thliarhran zirtirte, vawi khat hman plastic hmang lo tura inzirtirte, zirlaite ni tin nuna fai duhna sengluh tirte, fai tura hmalakna hrang hranga hruaitu ni tura zirtirte a ni.
‘Mizoram Green Schools League’ hawnna hunah hian khual zahawm leh School Education Minister Dr. Vanlalthlana chuan tunlai hian faina kawngah Mizo thlalaite an thangharh nasa hlea a hriat thu sawiin, mahni thu a mimal leh thianho tangruala hmun tawp leh bal lai deuhte tifaia an che chhuak hriat tur a awm fo thin tih a sawi a. Faina kawnga Mizo thalaite hmalak thinna chu fakawm a tih thu sawiin, Rel lo luh hnu pawh hian fai kan ngainatna hi khualzinte tana zirtlak leh entawntlak tura kan chhawmnun zel a pawimawh thu a sawi a. Mizoram Green School League hlawhtlinna tur hian Education Department chuan theihtawp a chhuah tur thu sawiin, Faina kawngah Zirtirtute leh School-a thawktu zawng zawngte chu zirlai naupangte tana entawntlaka an awm a pawimawh thu a sawi bawk.
He hunah hian UD&PA Department changtu Commissioner & Secretary V. Lalsangliana IAS chuan Swachha Bharat Mission 2.0 hnuaia faina kawnga Mizoram puma School inelna buatsaih a nih chhan sawiin, Jacob Lalawmpuia, State Mission Director SBM(U) & Director, UD&PA chuan inelna kalpui a nih dan tur a sawifiah bawk.