Sairang leh Lamka (Manipur) inkara tlan tur Bus pahnih Transport Minister in a vailiam
Mi 21 chuan theihna tur Bus vailiamna puala hun hman ah Transport Minister Vanlalhlana chuan, hnam ropuia insiam tur chuan Tlang hrang hranga cheng zohnahthlakte kan inlungrual a pawimawh thu sawiin, Mizoram chu ‘Zohnahthlakte Inpui’ a nih thu a sawi a. Manipur-a chi leh chi inkara buaina thleng avanga zin veivah kawnga Zohnahthlak ten harsatna an tawk thin chu pawi a tih thu sawiin, he hun hman hian Manipur leh Mizoram inkar zin veivakte harsatna thui tak a sutkian ngei a beisei thu a sawi a. Inunauna, inluangrualna leh inpumkhatna tha zawk siamna kawnga hmanraw tangkai tak a nih ngei a beisei thu a sawi bawk.
He Bus service tur hi ‘VK Tawna Travels’ niin an VK Tawna Travels-a CEO, Siamnunlian Valte chuan VK Tawna Inter-State Bus Service kalpui dan tur chungchang a sawizau a, VK Tawna Inter-State Bus Service-ah hian Bus pahnih, mi 21 ve ve phur thei an tlan dawn a. Lamka (Manipur) leh Sairang (Aizawl) inkar ah nitin Bus Service a awm dawn a ni. Sairang atanga Lamka hi km 360 bawr vela hla niin darkar 12 vel thang tura ngaih a ni a. Bus chuanman hi Rs. 2,500 a ni anga, VK Tawna Bus Service Mobile Application hmangin online in Bus ticket hi a book theih bawk dawn a ni.
Nimin-a hemi puala hun hman hi Adviser to Chief Minister (Technical) Er. H.Ginzalala MLA chuan hmanpuiin hmasawnna siam tura thil pawimawh berte zingah kawng hrang hranga inkalpawhna (Connectivity) tha neih chu a tul thu a sawi a. Manipur-a chi leh chi inkara buaina chhuak hian Mizorama Mizo chengte leh Manipur-a Zohnahthlakte inkarah inpumkhatna tha a siam zel nia a hriat thu a sawi a. Thil tha chauh inzirtawna, inentawna, inkawhhmuhtawn turin kalkhawmte a chah a, Mizoram chu dan leh thupek ngaih pawimawhna hmun a nih angin chung ang mizia chu chhawmnung zel turin khualzinte pawh fuih a pawimawh tur thu a sawi bawk a ni. He hunah hian Transport Department Director, Er. R. Lalrammawia pawhin Inter-State Bus Service chungchanga hriattur pawimawh hrang hrang a sawi bawk a, Mizoram State Transport Authority (STA) Member-te, Transport Department-a thawktute leh VK Tawna Travels enkawltute an tel a ni.