Ruihhlo hi nghei theih a ni tih hi kan inzirtir thar a tul - CM
Chief Minister Lalduhoma hian nimin khan CM Conference Hall-ah Lalnunmawii lehkhabu ziah, ‘A tur a na tawh lo ve’ tih chu tlangzarhin Lalnunmawii'n ngawlveite enkawl hna kum 26 zet a thawh hnua ruihhlo dona kawnga a tawnhriatte atanga lehkhabu hlu tak a buatsaih chu lawmawm a tih thu a sawi a, “Ruihhlo do zui zel tura a inpekna thute a lehkhabuah hian a hmuh theih a. A ngaihsanawm hle a ni. 'A kal tawh ten a kawng chin an hria' tih thufing ang deuhin ani hian ngawlveite chin a hria a, a lehkhabu hi ngawlvei mekte, an chhungkua leh ruihhlo do hna thawktu ten chhiar vek thei ila kan hlawkpui hlein ka ring,” a ti a. Ruihhlo chu nghei theih a ni tih hi kan inzirtir thar a tul thu sawiin, “Sim tum tak takte chu sawrkar pawhin kawng hrang hranga chhawmdawl a inpeih reng a ni. Hulhhliap Short Stay Centre-ah pawh ruihhlo nghei chauh zirtir lovin mahni a ke-a an din zui theih nan Skill Training kan pe tel a, an zinga mi 21 phei chu Handholding Scheme atangin CM Special Package kan pe tawh a ni. After Care Service lam kan uar hian ruihhlo ti thin, Home-a lut a, an chhuah hnu reilote a ti leh mai zelho hi kan sim hlentir theiin kan ring a ni,” a ti. Chief Minister chuan Ruihhlo do chu sawrkar pawhin a ngai pawimawh tih sawiin, “YMA te, Kohhran te leh NGO hrang hrangte nen nasa takin hma kan la a. Supply reduction lamah leh Demand reduction lama kan hmalakna ten rah tha a chhuah zel a, ruihhlo pawh a vang chho mek niin kan hria,” a ti bawk.