New Serchhip Bazar Veng-a In sak lai pakhat a chim
Serchhip IOC Veng-a cheng K. Lalchhandama te hian New Serchhip Bazar Veng huamchhung, Kudam kawn atanga Luiralmawi panna kawng, Govt. Serchhip College ram zawn velah RCC hmangin an chenna In tur hi an sa a, nimin zing dar 7:00 vel khan an In kawt kawngkam chu min in hei hian an In hi a chimpui a, In hi sak zawh loh leh la luah loh a nih avangin mihring thi leh hliam an awm lo nia thudawn a ni. Thudawn danin he In hi sak zawh tep ni tawhin chhawng hnih chu luah tura ruahman hmasak a ni a, chawlhkat khat vel khawih chhunzawm leh chuan a In bik hi peihfel mai tawh tura beisei a ni a, amaherawh chu nimin zing khan vanduaithlak takin a chim ta a ni.
Vanduaina thlenna hmunah hian New Serchhip North VC leh YMA ten a theih ang anga hma la nghalin leimin zui tur venna atan Silpauline te zar nghal a ni a, Serchhip DC Office atangin SDO (Sadar) Rebecca Laldinmawii Hrahsel chuan a hmunah tlawhin Silpauline an mamawh ang te a pe nghal bawk a ni.