MZP Assembly vawi 70-na neiin Home Minister in khuallian niin a hmanpui
MZP Assembly hi Darlawn-a Darkhawpui Rûn-ah nizan hmasa khan neih tan niin nimin khan Vantlang Inkhawm neih a ni a, he Assembly-a khuallian, Home Minister K. Sapdanga chuan India ram State thenkhatah MZP ang chi, Zirlai pawl hi an awm nual thu leh a tlangpuiin Political party sponsored zirlai pawl an ni hlawm tih sawiin, “MZP a danglamna chu chutianga sponsored a ni ve lo,” a ti a, Sawrkar nena tha taka thawkho tur leh a tul hunah chuan Sawrkar pawh huaisen taka thurawn pe thin tu a nih thu sawiin, “Eng issue-ah pawh hian rilru fim takput a tha,” a ti a. Zirlai ten Hnam kan vei dan huang kan zauh a ngai tih pawh sawiin, “State pawn lama hmun pawimawh hrang hrang tlawh leh dawr a ngaih chang hian Mizoram mi leh sa kan tlem em em a, Mizoram State Sawrkar hmun pawimawh-ah ngei pawh Mizo awm tur IAS, IPS kan awm mang tawh lo,” tiin a tui mite chu All India Service-ah leh Central Service-ah luh tum sauh sauh turin a fuih a. UPSC hnuaiah Civil Service kan zuam lo a nih pawhin Staff SelectionCommission hnuaiah Central Ministry hnuaia thawh tur hna tha tak tak exam tur awm reng thu a sawi bawk.
He hunah hian MZP President Dr. C. Lalremruata chuan Mizo Zirlai Pawl (MZP) chu kum 1935-a din tawh niin, rambuai avangin pawl pawhin a tuar thu leh kum 1993-ah din thar leh niin, tunah hian kum 90 lai an lo tling ve ta tih a sawi a. “Zirlai pawl-a inhmang te hi mi fing bik, mi fel bik kan nih loh avangin han chet fuh loh changte pawh kan nei tawh thin ngei ang, amaherawh chu Ram leh Hnam in chhan a ngaih apiangin mipui ten ‘Khawnge MZP a awm?’ an ti a, mipuiin min auh hmain kan lo che chhuak fo tawh thin, Kan lo che har deuh a nih pawhin mipui te beiseina hriain he pawl hi a che chhuak fo thin,” a ti.
MZP hre chianglo leh an Pisa-ah vawi khat pawh la lut lo, MZP Dan Bu pawh la chhiar lo leh MZP in ram leh hnam tana a thawh te hre duh miah lo ten nasa takin MZP chu an sawisel thin tih pawh sawiin, “MZP hian huanglo kan nei lo a, kan pawl thiltum ang zela kalin Committee-in ram leh hnam, zirlaite tana tha tur nia a ngaih ah chuan hma kan la mai thin,” aa ti bawk.